Politique

Partagé sur :
• facebook

Fotoana tokony hieritreretan’ny isam-batan’olona, indrindra ny Malagasy ny fahatongavan’ny fetin’ny 26 jona tahaka izao, hoy Rasoamiaramanana Goddefrin, Ben’ny tanànan’Ivato Aéroport.

Laharam-pahamehana ao anatin’izany, hoy izy ny fanaovana jery todika ny fiainam-pirenena toy ny hoe : aiza ho aiza isika izao ? Nomena fahafahana ny rehetra tao anatin’ny 50 taona katroka, ahoana no fomba nampiasana izany ?... Ho an’ity Ben’ny tanàna ity mantsy dia tsy mbola afa-po amin’ny zava-bita sy ny zava-misy eto amin’ny firenena izy. Mandroso indray mandingana ny firenena, hoy izy saingy mihemotra in-droa mandingana kosa. Tsy midika ho fandrosoana velively, hoy ihany ity Ben’ny tanàna ity, ny 50 taona nahazoana ny fahaleovantena, indrindra raha tsy hijery afa tsy ny toekarena sy ny fiainana ara-tsosialin’ny mponina isika.

Mitontongana hatrany ireto farany, hoy izy nanohy ny teniny ka tokony hojeren’ny mpitondra maika izay fomba hoenti-manarina izany. Ho an’ny kaominina Ivato Aéroport manokana dia fanaovana tomban’ezaka ny zava-bita no hanamarihan’ny Ben’ny tanàna sy ireo mpiara-miasa aminy ny fetin’ny 26 jona amin’ity indray mitoraka ity. Ho elanelanin’ny fanaovana tatitra amin’ny vahoaka amin’ny alalan’ny kabary izany arahin’ny vina handaminana ny asa ao anatin’ny herintaona ho avy. Tsiahivina fa maromaro ihany ny zava-bita teo anivon’ity kaominina ity tao anatin’izay roa taona sy tapany nitondran’ny Ben’ny tanàna Rasoamiaramanana ny tanàna izay. Anisan’izany ny fanatsarana ny fotodrafitrasa toy ny lycée sy ny Epp, ny asa fanarenana ny Ceg, ny fanamboarana ny Csb II vaovao… Ankoatra ireo dia hanomboka tsy ho ela koa ny asa fanamboarana ilay tsena lehibe vaovao sy manara-penitra misy rihina. 

Tia Tanindrazana

Samia mijoro ho an'i Gasikara.