Politique

Partagé sur :
• facebook

Foto-kevitra roa lehibe no mifandona eto amin’ny firenena amin’izao fotoana ary hita taratra eny amin’ny Filankevitra ambonin’ny tetezamita (CST) ihany koa izany, hoy Ranjivason Jean Théodore, filohan’ny antoko Matsilo.

Eo aloha ireo izay manao izay rehetra azo atao hanafainganana ny asan’ny tetezamita mba tsy hitarazohany ; fa eo kosa ireo izay manao ny fomba rehetra hampihemorana lava ny fifidianana ka hampaharitra ny krizy sy ny fitondrana tetezamita. Samy mahay miaro ny heviny ireo vondrona roa lehibe ireo ka izay no mahasarotra ny toe-draharaha amin’izao fotoana, hoy ihany Ranjivason Jean Théodore. Nitsotra moa izy fa tsy mora mihitsy ny adihevitra eny amin’ny lapan’Anosikely satria samy tsy manaiky lembenana amin’ny foto-kevitra ijoroany ny tsirairay avy. Araka ny filazany anefa dia ny fanatanterahana fifidianana faran’izay haingana ihany no vahaolana ivoahana amin’izao krizy izao.

Efa ho roa taona latsaka no tsy nanana rafitra sy lalàna mazava hitantanana azy ny firenena malagasy ka izay no tokony hahamaika antsika handany ny lalampanorenan’ny Repoblika faha-4, ho fototra hitantanana ny firenena, hoy ity mpikambana ao amin’ny CST ity. Na dia sarotra aza ny fikarohana ny marimaritra iraisana nandritra ireo dinika maro samihafa niarahan’ny mpanao politika teto an-toerana, dia hita fa mety sy tsara kokoa noho ny zavatra natao tany Maptuo ny fehin-kevitra nivoaka tao, hoy ihany i Ranjivason. Tokony hotohizana ny ezaka ary tsy tokony ho variana amin’ny ady seza sy ny fifanasana vangy ireo mpanao politika fa mba tena hijery ny tombontsoa ambonin’ny firenena, araka ny filazany ihany.

Tia Tanindrazana

Samia mijoro ho an'i Gasikara.