Politique

Partagé sur :
• facebook

Tsy manaiky ny hisian’ny fihaonambem-pirenena faharoa hokarakarain’ny CNOSC ny Escopol, araka ny fanambarana nataon’i Adolphe Ramasy ny sabotsy lasa teo. Efa mazava ny tapaka nandritra ny fihaonambem-pirenena nadraisan’ny olona 4 000 mahery anjara teny Ivato, hoy izy. Efa nisy ihany koa ny fifanarahana politika in-droa miantaona, ka inona indray no mbola ilaina mihoatra izany. Nanamafy kosa anefa ity loholon’ny Arema teo aloha ity fa azo atao tsara ny mikitika na manitsy ilay fifanarahana politika nosoniavina teny Ivato ny zoma 13 aogositra raha ilaina. Mety misy mantsy, hoy izy ny hevi-baovao avy amin’ireo ankolafy politika hafa tsy nanatrika io dinika io, ka raisina an-tanan-droa izany. Afaka mifampidinika sy mifampiresaka ny andaniny sy ny ankilany dia asiam-panitsiana ilay fifanarahana politika.

Azo ampiana na analana izany izay voasoratra ao. Tsy azo ekena kosa, hoy i Adolphe Ramasy ny fametrahana zavatra vaovao hamahana ny krizy, fa izay misy eo no hatsaraina. Miantefa mivantana amin’ny Ankolafy Telo moa io hafatra io. Mahakasika kosa ny fanelanelanana iraisam-pirenena, dia tsy hoe mitsipaka marin-drano izany Atoa Ramasy Adolphe fa mametraka tsara kosa fa fandaminana fa tsy fanakorontanana no tokony hataon’ny SADC sy izay mpanelanelana vahiny ho avy eto, izany hoe mitondra izay soso-kevitra hanatsarana ny ventin-kevitra efa misy izy ireo fa tsy handroso hevitra vaovao hafa indray. Ny fifanarahana politika no tokony hatao fototra iaingana amin’izay fifanarahana rehetra mety hatao, araka ny hevitr’ity mpanao politika ity satria iny no efa neken’ny antoko politika maro. 

Tia Tanindrazana

Samia mijoro ho an'i Gasikara.