Politique

Partagé sur :
• facebook

Hamaramparana ny tolona ny ankolafy Madagasikara, raha ny lahateny nifandimby re tao amin’ny Magro omaly.

Herintaona ngaragidiny izay no nanehoan’ireo vahoaka ny heviny tamim-pilaminana, nanohitra ny fanonganam-panjakana, ny tsy rariny. Tsy maintsy mitsangana ny vahoaka, hoy Rakotovazaha Olivier avy amin’ny ankolafy Ravalomanana. «Tsy hihemotra izahay», hoy ihany izy. Ho an’ity anio ity, dia hiavaka ny hetsika satria hiainga avy eny amin’ny isam-pokontany ireo mpanao fihetsiketsehana. Mialoha ny sioka tokana dia anio no famerenana farany. “Tsy maintsy mitsangana ny vahoaka. Rehefa dila ny 16 martsa dia ho avy ny vahoaka hametraka ny tetezamita araka izay voarakitry ny satan’i Maputo sy Addis Abeba”, hoy ihany ny sekretera jeneralin’ny MFM. Manomboka amin’io alarobia io, izany hoe rahampitso, araka ny fanazavany, dia apetraka ho ota sy fady ho an’ny taranaka faramandimby ny fanonganam-panjakana, izay henatra ho an’i Madagasikara, araka ny fanazavana ihany.

Tetsy an-danin’izay, dia nohamafisin’ny solombavambahoakan’i Soanierana Ivongo teo aloha, Mananjara Fidison na Rasomotra fa lainga ny vaovao afafy fa nahemotry ny GIC 30 andro ny fampiharana ny fanapahan-keviny mikasika indrindra ny fanasaziana ireo mpanongam-panjakana sy ireo mpanohana azy ireo. “Tsy kilalaon’ankizy ny fanapahan-kevitry ny GIC fa fanapahan-kevitra iraisam-pirenena. Tsy hihemotra na iray minitra aza izany”, araka ny fanazavan’ity olom-boafidy ity ihany. Raha ny fantatra moa dia hivory ny filankevitry ny fandriampahalemana sy ny filaminana na ny CPS ny 17 martsa, mikasika indrindra ny toe-draharaha eto Madagasikara sy izay ho fehin-kevitra sy fanapahan-kevira horaisina.

Tia Tanindrazana

Samia mijoro ho an'i Gasikara.