Politique

Partagé sur :
• facebook

Afa-po tanteraka tamin’ny fanehoan-kevitry ny filohan’ny FAT, Andry Nirina Rajoelina, Rajomalahy Samuel, solombavambahoaka teo aloha voafidy tao Ambalavao. Nomarihan’ity mpanao politika ity fa tena mipetraka amin’ny maha raiamandrenin’ny Malagasy rehetra azy ny filohan’ny FAT amin’ny tsy nilatsahany hofidiana.

Izany mantsy no takian’ny rehetra ka efa mazava izany ny resaka amin’izao fotoana, hoy Rajomalahy Samuel fa dia hanao izay hampandeha ny tetezamita fotsiny fa tsy manana eritreritra ny ho filoham-pirenena i Andry Rajoelina. Niantso ireo rehetra tsy an-kanavaka ao anatin’ny tetezamita koa anefa izy mba hanaraka izany ohatra tsara nasehon’ny filoha izany, ka tsy tokony hisy ho kandida amin’ny fifidianana mihitsy izany, raha ny tokony ho izy izay rehetra manana andraikitra ao anati’izao fitondrana izao, fa dia miasa mba hampalavorary ny tetezamita sy ny fanatanterahana ny fifidianana ary manomana ny fitsimbadihana any amin’ny Repoblika faha-4. Raha misy ny manana eritreritra ny hilatsaka hofidiana depiote na filoham-pirenena, na hanohana kandida hafa dia tokony mametra-pialana dieny izao, araka ny fepetra napetraky ny praiministra, hoy i Rajomalahy Samuel. Mikasika ny hoavin’ny firenena kosa dia niantso ireo manampahefana rehetra mba tsy hanapotika ny toekarena noho ny sangodimpanina politika sy ny fitiavan-tena ity olom-boafidy teo aloha ity. Aoka izay ny fanangonan-karena amin’ny fanaovana politika, hoy izy. Aminy, tsy tokony hiankin-doha be loatra amin’ny any ivelany i Madagasikara fa mihafy amin’izay kely hananana aloha dia miasa mafy raha te hanana misimisy kokoa sy hanatsara ny fiainana. Aleo mahay miaina amin’ny kely eo am-pelatanana toy izay miliba mindram-bola lava amin’ny any ivelany, ka hampibaby trosa amin’ny taranaka faramandimby, hoy Rajomalahy Samuel namarana ny fanehoan-keviny.

Tia Tanindrazana

Samia mijoro ho an'i Gasikara.