Politique

Partagé sur :
• facebook

Ankoatra ny fifampidinihana eo amin’ny mpanao politika sy ny fanelanelanan’ny fiarahamonim-pirenena, dia misy hevi-baovao manomboka mipoitra indray amin’izao fotoana ho famahana ny krizy.

Fantatra mantsy fa misy vondron’olona, eto an-toerana mieritreritra ny hampihaona an’Atoa isany Marc Ravalomanana sy Andry Rajoelina, izay fototra niaingan’ny krizy. Efa ela tokoa no resy lahatra ny maro fa ny fihaonana sy fifampidinihana maharitra eo amin’ny roa tonta no tena ho dingana lehibe amin’ny famahana ny krizy. Hatrizay tokoa mantsy dia fihaonana maimaika tsy nahitam-bokany firy loatra no nisy teo amin’izy mianaka, fa dia tahaka ny voasaron’ilay fifampidinihana teo amin’ny Ankolafy efatra hatrany ny resaka. Hanova zavatra maro anefa ny fifanazavana mivantana eo amin’ny filohan’ny Repoblika teo aloha sy ny filohan’ny FAT. Mbola mijanona ho eritreritra fotsiny aloha hatreto io fampihaonana an’i Marc Ravalomanana sy Andry Rajoelina io, fa tsy tetikasa tena matotra. Na izany aza anefa dia re fa miketrika mafy ny mety ho fanatanterahana izany, ireto vondron’olona, mahatsapa fa tsy hamaha ny krizy velively ireo karazana dinika natao hatramin’izao, raha tsy mifanazava tsara ireo mpifanandrina fototra, nihavian’ny krizy. Ny olana lehibe anefa, dia ny hoe : hanaiky ny fampihaonana azy ve ny roa tonta, ary raha raikitra ny fihaonana dia aiza no hanatanterahana azy ? Ny eto Madagasikara aloha, dia sarotsarotra ihany, satria mbola maro ny sakana tsy hahafahan’ny filoha teo aloha mody an-tanindrazana. Ny filohan’ny FAT kosa etsy andaniny efa nanambara ombieny ombieny fa tsy mazoto loatra amin’ny fivoriana atao any ivelany ny tenany. Na izany aza dia samy efa nilaza tamin’ny fanehoan-keviny ny roa tonta fa vonona hatrany ny hikaroka ny vahaolana mahomby hivoahan’ny firenena amin’izao krizy izao. Ka ho hita eo ihany ny tohiny.

Tia Tanindrazana

Samia mijoro ho an'i Gasikara.