Politique

Partagé sur :
• facebook

Ataon’ireo mpitandro ny filaminana hazalambo ireo mpitarika fihetsiketsehana fanoherana ny tsy rariny sy fanapenam-bava ny vahoaka tsy haneho ny heviny, nitranga tao Toliara ny zoma 27 aogosotra teo, ka niteraka fahapotehan’ny fitaovana sasantsasany tao amin’ny radio Soatalily.

Hatramin’ny ora nanoratana dia miisa fito no voasambotra hatramin’ny sabotsy no  ho mankaty. Anisan’ireo voasambotra i Evaharane Torimana (filohan’ny antoko Fanasin’i Madagasikara), Patita Lentera (mpanao ady totohondry), Papa Rakotovao Tsimananjoky (filohan’ny fikambanana Masikoro), Rafilo Jean Felista (mpanolotsaina monisipaly Toliara I), Rabeony Mandridake (mpandraharaha) ary i Sazalahy. Karohin’ny mpitandro ny filaminana fatratra ihany koa ny profesora Elindraza Mandridake izay nitarika ny hetsika. Tsiahivina fa tao amin’ny kianjan’ny demokrasia amoron-dranomasina no saika hanaovan’izy ireo fihetsiketsehana ny zoma teo saingy efa feno miaramila mialoha izany toerana izany. Niezaka niresaka tamin’ireo miaramila ihany ny profesora saingy tsy vita akory ny dinika tokony ho tamin’ny telo ora sy sasany dia nirefotra ny grenady. Tezitra noho izany ny mponina tany an-toerana ka nanehoan’izy ireo ny hatezerany ny Radio Soatalily, na RNM ao an-toerana. Nisy nanararaotra izany ka naka ny fitaovan’ny radio, toy ny «camera» sy ny ordinatera isan-karazany. Ny sasany namoaka ny entana sasany teny an-tokotany ka nandoro izany. Nanao be fiavy ireto andian’olona ireto ka izay no anton’ny tsy nahafehezan’ny mpitandro ny filaminana tany ity toe-draharaha ity.  

Tia Tanindrazana

Samia mijoro ho an'i Gasikara.