Politique

Partagé sur :
• facebook

Manamafy ny DR Raharisaina Hery anisan’ireo parlemantera Tiako I Madagasikara (TIM) miara-dia amin’ny Ankolafy Telo fa tsy vahaolana ivoahana amin’ny krizy mihitsy ny nananganana ny CST (Filankevitra ambonin’ny tetezamita) sy ny CT (Kongresin’ny tetezamita) amin’izao firafitra sy endriny izao.

Rafitra tsy eken’ny rehetra ary tsy ankatoavin’ny sehatra iraisam-pirenena ireo ka azo sokajiana ho rafitra sandoka sy famitaham-bahoaka araka ny nambarany tamin’ny mpanao gazety ny faran’ny herinandro teo. Tsy misy afa-tsy ny fiverenana amin’ny resaka an-databatra boribory ihany no tena mety, ary tsy maintsy ahitana ireo filohan’ny Ankolafy Efatra nanatrika ny fihaonana tany Maputo izany, izany hoe Atoa isany Didier Ratsiraka, Marc Ravalomanana, Zafy Albert ary Andry Rajoelina. Mazava ho azy fa tsy maintsy eo ambany fiahian’ny sehatra iraisam-pirenena io fihaonana io, mandray anjara mavitrika amin’izany koa anefa ireo mpanelanelana eto an-toerana, izay eken’ny besinimaro, fa tsy olon’ankolafy tokana tahaka ireo nikarakara ny fihaonambem-pirenena tandrametaka farany teo.

Mikasika ireo parlemantera TIM nanaiky ny hotendrena ho mpikambana ao amin’ny CST sy ny CT kosa dia nanamarika ny depiote Raharisaina Hery fa tsy nahazo tsodrano avy amin’ny antoko sy ny birao politika mihitsy izy ireo, fa dia nanao izany tamin’ny alalan’ny tenany manokana, tsy filohan’ny Tiako i Madagasikara izany Raharinaivo Andrianatoandro fa misandoka andraikitra sy misora-tena fotsiny, araka ny filazany ihany. Noho izany rehetra izany dia fitaka bevava ataon’ny vahoaka ny filazana fa efa ahitana taratra ny fiaraha-mitantana ny parlemanta natsangan’ny FAT, satria dia olona mitovitovy hevitra sy maika amin’ny fizarana seza no niditra tao fa tsy tena olona mikaroka izay mahasoa ny vahoaka malagasy, hoy ihany i Hery Raharisaina.

Tia Tanindrazana

Samia mijoro ho an'i Gasikara.