Politique

Partagé sur :
• facebook

Amin’ny endrika faly saingy ny vatana hita ho reraka sy nihena no nivoahan’ireo mpanao gazety miisa enina niampy teknisianina efatra tetsy amin’ny fonjan’Antanimora omaly alina. Tamin’ny valo ora sy sasany alina izy ireo no nivoaka rehefa avy nanasonia ny “décharge” sy ny atontan-taratasy hafa mifandraika amin’ny fahazoany fahafahana vonjimaika.

Nivavaka avy hatrany izy ireo vao nivoaka ny varavaran’ny fonjan’Antanimora, fihetsika nampihetsi-po ny maro tonga teny. “Tsy dia misy ambara betsaka aloha fa ny hamonjy ny fianakaviana no mahamaika taorian’izay dimy volana tsy niarahana izay. Ho hita eo ihany izay fandehan-javatra” raha araka ny fanazavan’i Lôlô Ratsimba, mpanao gazetin’ny radio Fahazavana, onjampeon’ny Fiangonan’i Jesoa Kristy eto Madagasikara, rehefa nanontanian’ny mpanao gazety marobe izay tonga teny an-toerana, sady tonga ny hitsena mba ho mariky ny fiombonam-po no nanao ny asany ihany koa. «Lasibatra tamin’ny filazana ny marina ny mpanao gazety. Tsy nisy ny fiavahana nandritra ny nitazomana anay tao fa dia nafangaro bambaray tamin’ny jiolahy sy ny mpangalatra. Nisy fotoana 50 no nakambana», hoy kosa i Josiane Ranaivo, vavy tokana tamin’izy folo mianadahy mpiasan’ny fahazavana nogadraina ireto. Nohamafisiny fa “mifameno amin’ny maha kristianina ahy ny mitory ny fahamarinana, nefa misy tsy mahazaka izany”. I Jaona Raoly kosa no nampahatsiaro fa «mbola betsaka ireo voatana ao Antanimora noho ny fanehoan-keviny». Tampotampoka ihany ity fanapahan-kevitry ny fitsarana ity.

Tokony ho tamin’ny telo ora tolakandro mantsy, omaly, no nidina ny baiko izay tsy fantatra mazava hoe avy aiza ny amin’ny hamoahana ireo mpanao gazety faran’izay haingana. Tamin’ny telo ora sy fahefany dia efa nivoaka ny atontan-taratasy voasonian’ny tomponandraikitra manome alalana ny fahafahana vonjimaika ireo olona voalaza etsy ambony. Raha tsiahivina dia ny 20 mey 2010 lasa teo, taorian’ny raharaha FIGN no nosamborina ireo mpanao gazety ireo. Notazomina teny amin’ny BC aloha nandritry ny herinandro, hatramin’ny 27 mey, mba hohadihadiana. “Fandrisihina ireo miaramila hikomy”, fiampangana izay voalaza fa misy fiantraikany amin’ny filaminana anatiny no antony nitazomana sy namonjana azy folo mianadahy. Nandeha hatrany ny fivezivezena Antanimora-Anosy noho ny fanadihadiana. Tsy nahazo rariny mihitsy ireo tao anatin’izay, porofon’izany ny tsy nanomezana mihitsy ny fahafahana vonjimaika izay nangatahin’ny mpiaro ireto mpanao gazety ireto. Omaly, tany amin’ny fotoana tsy nampoizina dia nivoaka tampoka izany fangatahana izany. Tsy fantatra izay mety ho antony fa ho an’ny fianakaviamben’ny mpanao gazety aloha dia fifaliana no nitsenana ireo namana nivoaka teny Antanimora. 110 andro no nitanana ireo mpiasan’ny radio FJKM ireo, ka 7 andro tao amin’ny “violon”-n’ny BC Anosy ary 103 andro tao am-ponjan’Antanimora. 

Tia Tanindrazana

Samia mijoro ho an'i Gasikara.