Politique

Partagé sur :
• facebook

Herinandro taorian’ny fametra-pialana nasaina nataon’ingahy Fanoina Solo André, Ben’ny tanànan’i Morondava, renivohitry ny Faritra Menabe, dia fantatra izao tsy hiandry izay fifidianana ben’ny tanàna ny FAT fa hiroso amin’ny fanendrena delegasiona manokana (PDS) hitantana ny tanàna.

Anarana efatra no efa mandehandeha hatreto ka vehivavy ny iray. Amin’izy efatra ireo indray dia mpiasa amin’ireny tetikasa ny roa, mpiasa tsy miankina ny iray ary mpiasam-panjakana efa misotro ronono ny faha-efatra. Araka ny fantatra koa anefa dia saika mpikambana na mpiara-dia amin’ny TGV, antokon’izao fitondrana izao, ireto olona ireo. Raha ny zava-nisy tao an-drenivohitry ny Faritra Menabe ity dia tonga nanao fisafoana sy nanadihady ny fitantanana teo anivon’ny Kaominina ny mpanadihady asam-panjakana avy aty Antananarivo, nanomboka ny zoma 10 septambra. Voakasika manokana tamin’izany ny lafiny ara-bola, izay nahitana lesoka betsaka ; toy izany koa ny fanomezan-dalana hanao fanorenan-trano nefa tsy hita taratra ao amin’ny fidiram-bolan’ny Kaominina. Am-bolana maro no nisedra olana ity Kaominina ity.

Matetika ny mpiasa tao no mitokona fa tsy nandray karama, nihandrona efa ho herintaona mahery. Nisy fiantraikany tamin’ny fampandehanan-draharahan’ny Kaominina io toe-javatra io. Misy vola miditra ihany anefa, raha tsy hiteny afa-tsy ny azo avy amin’ny haban-tsena fotsiny, saingy tsy nahavaha olana izany. Noterena nametra-pialana ingahy Ben’ny tanàna noho izany. Tsy niandry ela izy fa ny tolakandron’ny zoma 17 septambra teo ihany dia efa notanterahiny izany. Marihina fa Ben’ny tanàna voafidy avy amin’ny listra tsy miankina i Fanoina Solo André. Izy no isan’ny nitarika ny fikomiana tao Morondava rehefa nihetsika ny TGV.

Jean D.
 

Tia Tanindrazana

Samia mijoro ho an'i Gasikara.