Politique

Parlemantera ACP-UE Ho avy eto rahampitso

Politique
Zoma 09 Jolay 2010

Parlemantera 6, solontenan’ny Parlemantera avy amin’ny Afrika, Karaiba, ary Pasifika (ACP) sy ny Vondrona Eoropeanina no ho avy eto Madagasikara ato anatin’ny roa andro, dia rahampitso sabotsy sy ny alahady ho avy izao. Hizaha ny zava-misy eto amintsika ireo Parlemantera ireo, izay ahitana an’i Odirile Mothale avy any Botswana izay filoha mpiara-mitantana, Kilotsi Mporogomyi avy any Tanzanie ary Waven William avy any Seychelles hisolo tena ny ACP, ary Elie Hoarau sy Michèle Rivasi samy avy any Frantsa ary Joanna Senyszyn avy any Pologne, ireo no hisolo tena ny Eoropeanina. Nanaraka akaiky ny fandehanan-javatra rehetra teto amintsika ny Assemblée Paritaire ka dia nanapa-kevitra ny biraony handefa ity iraka ity hijery ny fivoaran’ny toe-draharaha sy ny zava-misy marina. Hihaona amin’ireo ankolafy rehetra ireto Parlemantera ireto na mpanao politika io na ireo avy amin’ny fiarahamonim-pirenena. Fantatra ihany koa fa hitafa amin’ny mpanao gazety izy ireo ny harivan’ny sabotsy. Hijery ny fizotry ny tetikasa sasantsasany izay vatsian’ny Vondrona Eoropeanina vola ihany koa ireto depiote ireto ny alahady. Raha tsiahivina moa dia anisan’ireo nankato voalohany ny fanasaziana ireo mpanongam-panjakana sy ny fanasaziana an’i Madagasikara noho ny tsy fiverenana amin’ny ara-dalàna ity Vondrona Parlemantera ity.

Soa