Politique

Nahazo Ministera Nifanao dom-bera ny �La 19�

Politique
Talata 20 Jolay 2010

Nifamotoana teny amin’ny Mess Fiadanana ireo miaramila tamin’ny andiany indray mihira faha-19 tao amin’ny Akademia Miaramila Antsirabe ny sabotsy, farany herinandro teo. Ny lietnà kolonely Mandehatsara Georget, Ministry ny jono sy ny harena an-dranomasina, voatendry ny alatsinain’ny pentekôty teo no tompom-panasana. Mazava loatra fa fifampizarana hafaliana amin’ny nanendrena azy amin’ny maha ministra no anisan’ny antony. Fa ho an’ny mpiray andiany dia zava-dehibe ho azy ireo koa izany hoe nahazo ministera ny “La 19” izany, ka dia nomarihina tamin’ny dom-bera ny fiarahana tamin’io fotoana io. Nandimby toerana an’i Alain Andriamiseza ny lietnà kolonely Mandehatsara Georget. Filoha nasionalin’ny antoko MCDM, Legalista mpikambana tao amin’ny “Alliance Démocratique” teo aloha, ary mpitarika ny FFM ivondronan’ny “Foko 18” ankehitriny, nitana izany ministera izany teo anelanelan’ny 08 septambra 2009 ka hatramin’ny 24 mey 2010 teo itsy voalohany. Zanak’i Vatovavy Fitovinany ny lietnà kolonely Mandehatsara Georget ministra ankehitriny, ary manana rohim-pihavanana amin’ny kolonely Faharo Ratsimbalison, Lehiben’ny Faritra Menabe ankehitriny. Mpiara-miasa akaiky aminy aza ny zanak’ity farany.

Nangonin’i Jean D.