Politique

Partagé sur :
• facebook

Mila ezaka sy finiavana goavana ny fanovana ny fanaovana politika eto Madagasikara. Ny toetry ny mpanao politika mihitsy no manimba ny politika ary namotika ny firenena.

Toa lasa fitadiavam-bola sy fangoronan-karena ary fomba haingana hanaparam-pahefana ny fanaovana politika sy fiakarana eo amin’ny fitondrana. Nisy akony ratsy ary tena nangidy ho an’i Madagasikara ireo krizy nifandimby teto. Firenena mahantra indrindra eto ambonin’ny tany i Madagasikara kanefa tany anisan’ny manana harena ankibon’ny tany sy an-dranomasina betsaka indrindra. Tsy maintsy misy ny fianarana ataon’ireo mpanao politika, misy ny fanovana ny fomba fisainana, zava-dehibe ny fananana toetra manorina fa tsy mandrodana lava noho ny fialonana. Ezaka hahatongavana amin’izany no anton’ny fihaonana etsy amin’ny Hotel Carlton izay atrikasa andiany faha-3 miompana amin’ny famolavolana vinam-piarahamonina sy fandaharanasa politika ho fampanjakana ny demokrasia milamina sy tsy manavaka ity tohanan’ny programan’ny Firenena mikambana momba ny fampandrosoana ity. Miainga amin’ny tetiandro fampandrosoana hatramin’ny taona 2030 mivoy ireo singa fototra miisa 5 na «5P» antoky ny fampandrosoana maharitra tsy mialonjafy moa io fifanakalozana sy adihevitr’ireo mpanao politika io dia ny izao tontolo izao, ny fiaraha-miombon’antoka, ny filaminana, ny fampivoarana ary ny mponina. Mitaky fanaovana politika vaovao mifantoka sy manome vahana tanteraka ny vahoaka ny fampandrosoana maharitra, hoy ny solontena lefitry ny Pnud monina eto Madagasikara Marie Dimond. Anisan’ny antoko tazana nahatonga solontena eny an-toerana ny HVM, TIM, MAPAR, MMM, PSD…ary tsapa fa nafana ny adihevitra omaly. Ho mora kokoa ho an’ny vahoaka ny maneho am-pahendrena ny safidiny rehefa mazava ny fandaharanasa sy ny vina avy amin’ireo antoko politika. Resaka iray mbola mila dinihana lalina koa anefa ilay fanomezana zavatra kely ho fanambazana ny mpifidy…angamba satria lasa izay mahatolotolotra no mahazo tombony. Tsy mbola vita ny fampihavanam-pirenena eto ary tena mila tanterahana mialoha ny fifidianana mba hampisinda ny ahiahy.

RTT sy Ramano F

Tia Tanindrazana

Samia mijoro ho an'i Gasikara.