Politique

Partagé sur :
• facebook

Hafa mihitsy ny fanaovana politika eto amintsika. Rehefa eo amin’ny fitondrana dia hafa ny fiteny, rehefa tsy eo intsony kosa dia mivadika koa ny lela. Nahazendana ireo mpanara-baovao ny filazan’i Monja Roindefo tamin’ny fihaonany tamin’ny mpanao gazety tamin’iny faramparan’ny herinandro lasa iny izay nilazany fa tsy nametra-pialana ny filoha Ravalomanana fa namindra fahefana tamin’ny miaramila.

Sivy volana anefa no naha teo amin’ny fitondrana an’i Monja Roindefo, taorian’ireny fanonganam-panjakana ireny, tsy niloa-bava ny tenany fa amin’izao ora sy fotoana izao, efa tsy eo amin’ny fitondrana intsony vao sahy nilaza izany. Tsy nihambahamba koa ny lehilahy nilaza fa efa namindra fahefana tamin’ny tetezamita araka ny satan’i Maputo ihany koa i Andry Rajoelina. Nilaza koa anefa izy fa dia mbola praiministra hatramin’izao satria mbola manan-kery ny taratasin’ny Fitsarana avo momba ny lalàmpanorenana 0079/HCC-G/02. Ankoatra izay dia nambarany ihany koa fa tokony hisaina tsara ny amin’izay anjara andraikiny tamin’ireo krizy rehetra teto amin’ny firenena ny Amiraly mialoha ny hodiany an-tanindrazana.

Tokony hiaiky Atoa Didier Ratsiraka, hoy izy fa nanao fahadisoana teto amin’ny firenena, toy izay nataon’ny praiministra britanika teo aloha, Tony Blair. Tetsy andanin’izany dia nambarany fa an-terisetra ny referandaoma kasaina hatao amin’ny 17 novambra. Tsy hamaha olana io, hoy izy satria tsy hahazoana ny fankatoavana iraisam-pirenena. Momba ny Tsena Mora karakarain’ny FAT sy ny TGV kosa dia nambarany fa tsy misy mangaraharaha. Tokony hampahafantarina ny olona ny famatsiam-bola natokana ho an’izany tsena izany ary dia nangataka ny amin’ny tokony hisian’ny mangarahara eo amin’ny fitantantanam-bolan’ny fiadidianan’ny FAT koa ny tenany. Niova fiteny sa niova palitao i Monja Roindefo ? Na izany aza dia takian’ny vanimpotoana ny fahitsiana miteny toy izany, hivoahan’ny marina ihany koa. 

Tia Tanindrazana

Samia mijoro ho an'i Gasikara.