Politique

Marc Ravalomanana Nankahery ny mpomba azy

Politique
Alarobia 24 Novambra 2010

Raha mieritreritra ny FAT fa ho tapaka hatreto ny tolona rehefa tsy nomena ny toerana rehetra izay nangatahina rehetra mba hanatontosana izany - tsy vitan’izany aza fa mbola najanona tamin’ny fampiasan-kery ihany koa ny fanehoan-kevitra izay anaty tanàna mifefy tetsy amin’ny Magro Behoririka – dia tsy izany velively ny zava-misy. Hitohy ny tolona ary mainka koa aza hihamafy izany. Nankahery ny mpomba azy ny filoha Marc Ravalomanana omaly ary nilaza fa tsy izy no hilavo lefona. Mitohy ny tolona, hoy izy, nanentana ireo mpiara-dia aminy. Araka ny fantatra dia etsy Ivandry, ao amin’ny «villa Elisabeth» izay an’ny Profesora Zafy Albert no hanatontosana izany manomboka anio.

Ary tsy hiandry ela akory fa anio tolakandro dia efa hifamotoana eny ny olona. Hoporofoin’ny Ankolafy Telo fa tsy azo fefena ny olona amin’ny fanehoan-keviny. Tsy azo ferana ihany koa ny demokrasia. Nanamafy izany ny Dr Rakotovahiny Emmanuel nandritra ny valandresaka ho an’ny mpanao gazety nataon’ny Ankolafy Telo tao amin’ny «villa Elisabeth» omaly tolakandro, fa tsy hihemotra izy ireo na eo aza ny sakantsakana samihafa. Asa indray izay mbola hitan’ny FAT hatao amin’ity fanapahan-kevitra vaovao ity... Ho hita manaraka eo ihany