Politique

Marc Ravalomanana : Nampatsiahy ny fifampifehezana

Politique
Alakamisy 01 Aprily 2010

Izao tontolo izao no efa miara-miaiky fa tsy ara-dalàna ny fitondrana eto Madagasikara. “Samy tia tanindrazana isika, ka tsy maintsy mijoro, ary mijoro hatramin’ny farany, ao anatin’ny firaisankina sy ny fifampatokisana. Koa ho tohin’ny efa nataontsika hatramin’izay, dia tsy maintsy mipetraka ary hamafisina ny fifanajana sy ny fifampifehezana”, hoy ny filohan’ny ankolafy Ravalomanana ho an’ireo mpitarika sy mpikambana rehetra ao amin’ny firehany tarihiny. Nanao karazana fampahatsiahivana ny fifampifehezana i Marc Ravalomanana. Nambarany fa tonga amin’ny kihon-dalana lehibe isika izao koa tokony ho mailo sy handinika tsara satria zava-dehibe ny tombontsoa sy ny hoavin’ny firenena. Manoloana izany indrindra dia nanao antso amin’ny ankolafy tarihiny ny filoha Ravalomanana ny amin’ny tsy tokony handraisana fanapahan-kevitra irery fa hifampidinihana. Omena ny toerany ihany koa ireo Parlemantera, araka ny fanazavana, mandritra ireo fihaonana sy fivoriana rehetra. Ankoatra izay, nohamafisin’ny filohan’ny ankolafy Ravalomanana ihany koa ny tokony hitandroana hatrany ny fiarahan’ny ankolafy Madagasikara sy ireo mpiara-dia hafa.

Nangonin’i Soa