Politique

Partagé sur :
• facebook

Ara-bakiteny ny an’ny Fahefana Avon’ny Tetezamita (FAT) ny valy bontana amin’ireo lohandohany mpitarika avy amin’ny ankolafy Madagasikara, taorian’ny nivoahan’ny sazy avy amin’ny Vondrona Afrikanina.

Lasibatra amin’izany ny filoha teo aloha Marc Ravalomanana. Tsy nijanona fa nitohy hatrany ary toa vao mainka aza nihamafy ny fanenjehana ataon’ny FAT azy. Omaly dia nandalo teo amin’ny fitsarana, momba ny heloka bevava tsotra, nofohazina indray ny raharaha tany etsy Andohatapenaka saika hananganana orinasa mpanao sakafom-biby, tetikasa niarahana amin’ny sampandraharahan’ny Firenena Mikambana momba ny sakafo. Didy dimy àry no navoakan’ny fitsarana mikasika azy io. Fanodinkodinana volam-panjakana, firaisana tsikombakomba, fanomezana vahana olona, no vesatra niampangana an’i Marc Ravalomanana. Dimy taona an-tranomaizina sazy mihatra, sazy an-terivozona ary lamandy iray tapitrisa ariary no didim-pitsarana nivoaka omaly ho an’ity filoha teo aloha. Ankoatra azy, dia nisy olona fito hafa voakasik’ity raharaham-pitsarana ity, ka anisan’izany ny filohan’ny faritra Analamanga teo aloha. Dimy taona an-tranomazina, miampy sazy an-terivozona ary efatra tapitrisa Ariary ho lamandy no saziny. Ny Tale jeneralin’ny Alma sy vehivavy iray hafa dia nafahan’ny Fitsarana noho ny fisalasalana. Raha ny zavatra hita dia nofohazina sady nihazakazahana ny famoahana izao didy izao. Tahotra sa valifaty sa antsojay no tian’ny FAT hatao amin’i Marc Ravalomanana. Raha mbola teo amin’ny fitondrana mantsy ny tenany no efa namoronan’ny FAT izao antsojay rehetra izao. Rehefa nahazo fahefana koa izy ireo ankehitriny dia atao avokoa ny fomba rehetra tsy hidirany eto an-tanindrazana, na koa hanagadrana azy. Ny ho avy no hamantarana ny tena anton’izao fihetsiky ny FAT izao.

Tia Tanindrazana

Samia mijoro ho an'i Gasikara.