Politique

Leo fandrirariran�ny FAT Mitroatra ny sendikan�ny Mpitsara

Politique
Zoma 06 Aogositra 2010

Leo ny fandrirarirana ny Mpitsara ka tsy hanaiky intsony. Manomana hetsika goavana ny sendika ato ho ato izay tsy hampoizin�ny fitondram-panjakana mihitsy ny fiantraikany.

“Efa masaka ny hetsika hatao saingy aleo rehefa mihatra dia iaraha-mahita eo”, hoy i Auguste Marius Arnaud, filohan’ny Sendikan’ny Mpitsara eto Madagasikara (SMM). Milaza ho tsy mahafantatra izay hetsika hotontosain’ny mpitsara koa ny ministry ny fitsarana, Razanamahasoa Christine raha nanontaniana. Raha tsiahivina ny tantatra dia nanapa-kevitra ny hanapaka ny fiaraha-miasany amin’ny FAT ny SMM rehefa tsy nasian’ny fitondram-panjakana tohiny ny fangatahany fanomezana ny “rubrique 508” ho an’ireo mpitsara andiany farany. Fitakiana rariny raha ny fanazavana satria tokony hitovy ny fitantanana ny mpiasam-panjakana rehetra. Anisan’ny fepetra mivaingana noraisin’ny SMM izay mbola tazoniny hatramin’izao ny tsy fanendrena ny solontena ao anatin’ny rafitra isam-paritry ny CENI. Ny 05 jona 2010 anefa dia noraisin’ny filohan’ny FAT ihany ny biraon’ny SMM momba io raharaha io. Nampanantena i Andry Rajoelina tamin’io fa halamina aorian’ny fetin’ny 26 jona io olana io ary tambin’izany dia tsy mahazo manao fanambarana fa mangina ny SMM.

Nankatoavin’ireto farany izany saingy dila ihany ny fe-potoana fa tsy mbola nilamina ny momba ireo mpitsara nivoaka farany ireo. Nanoloana izany dia nandefa taratasy fampatsiahivana tany amin’ny fiadidiana ny FAT ny SMM ny 14 jolay saingy tsy nahazoam-baliny izany hatramin’izao. Izay indrindra no nampipoaka ny sarom-bilany satria mahatsiaro tena hatao tsinotsinona ny mpitsara. “Olon-dehibe izao no nifanaiky saingy tsy hita izay vokany. Aoka kosa izay ny fandrirarirana”, hoy i Auguste Marius Arnaud. Notsindriany fa ny fanjakana amin’izao fotoana mihitsy no tsy mahavita azy satria disadisa amin’ny lehiben’ny sampandraharaha roa eo anivon’ny ministeran’ny tetibola no manakana ny tsy fahazoana ny “rubrique 508”. Olana izay heverina ho tsotra nefa tsy voavahan’ny FAT.

Mihoapampana

Vao mainka nampitroatra ny SMM koa anefa ny namoahan’ny fiadidiana ny FAT didim-pitondrana mitondra ny laharana 4227/2009 izay manome tambikarama mihoa-pampana ireo mpiasa rehetra eo anivon’ity andrim-panjakana ity. Ny 29 jona teo no nosoniavin’i Andry Rajoelina io didim-pitondrana izay nanan-kery nanomboka ny volana jolay teo. Ankoatra ny karama dia mandray tambikarama 1.100.000 ariary isam-bolana ny Tale jeneraly, 1.000.000 ariary ny “Inspecteurs d’etat”, 900.000 ariary ny “Contrôleur d’Etat”, 850.000 ariary ny “Chef de service” sy ny “Planificateur Principal”, 750.000 ariary ny “Dépositaire”, ny “Secrétaire particulier” ary ny “Attaché de planification”, 350.000 ariary ny “Secrétaire”, 100.000 ariary ny mpamily ary 80.000 ariary ny “Planton” sy ny “Femme de ménage”. Amin’ny SMM dia tsy azo ekena izao fanomezana tombontsoa mihoapapana izao. “Mandray tambikarama noho ny asa koa izahay izay mitotaly 800.000 ariary isam-bolana izany hoe mbola latsaka raha oharina amin’ny raisin’ny “Chef de service” sy ny “Planificateur principal”. Tsy misy antony izany ny fianarana nataonay fa vitan’ireo olona ireo. Raha izany no izy dia aleo aterina eny Ambohitsorohitra ny diplaoma dia izy ireo no manao ny asan’ny Fitsarana” hoy ny mpitsara am-perinasa iray.

Yves