Politique

Partagé sur :
• facebook

Tsy niandry ela fa ora vitsy taorian’ny fanambarana nataon’ny Komity Miaramila ho an’ny Fanavotam-pirenena, dia nanao fanambarana ny praiministra Camille Vital, niainga avy eny amin’ny Lapan’i Mahazoarivo, nilaza fa entina mba tsy hahatanteraka ny fitsapan-kevi-bahoaka iny, ary fomba entina hanakorontanana ny saim-bahoaka fotsiny ihany.

Niantso ny Malagasy ho tony izy tamin’izany ary nampahatsiahy fa efa voadinika tamin’ny “Assises militaires» tamin’ny taon-dasa ny aretina mikiky ny foloalindahy. Tamin’ny teny hentitra kosa anefa no nilazany fa tany tan-dalàna i Madagasikara ary hampiharina amin’ireo mihoa-pefy ny lalàna. Nanamarika anefa ny mpanao gazety fa somary nangovitra ihany ny jeneraly Vital namaky ny fanambarana teny an-tanany, midika fa halohalika ny ranombary. Nanotrona azy tamin’izany moa ny jeneraly Rakotoarimasy Lucien (ministry fiarovam-pirenena), ny jeneraly Rabarisoa Ranto (filohan’ny komitim-pirenena momba ny fiarovana), ny jeneraly Randrianazary (Sekreteram-panjakana miadidy ny zandarimariam-pirenena), ny jeneraly Ndriarijaona André (lehiben’ny Etamazaoron’ny tafika), izay samy nanao fanamiana miaramila avokoa. Ny filohan’ny FAT, Andry Rajoelina, moa tetsy andaniny raha nandalo nizaha fanisam-bato tamin’ny birao fandatsaham-bato teny Ambatobe teny dia nilaza fa vahoaka no nitaky fanovana teto, ary tsy matahotra izy manoloana ny fandrahonana miantefa aminy sy ny fitakiana ny fialany amin’ny fitantanana ny firenena. 

Tia Tanindrazana

Samia mijoro ho an'i Gasikara.