Politique

Partagé sur :
• facebook

Tsy vahaolana amin’ny krizy ny fizarana amin’ny tafika ny minisitera sasany ao amin’ny governemanta. Miteraka fizarazana eo amin’ny fiarahamonina sy ny foloalindahy izany raha ny hevitry ny Manda ho an’ny Firaisam-pirenena, tarihin’i Lalatiana Ravololomanana. Porofon’izany ny fisian’ny miaramila izay miandany amin’ny Fahefana Avon’ny Tetezamita (FAT) ka manao tsy omby aloha hiditra ao amin’ilay governemantan’ny fanavotam-pirenena tian-kapetraka. Etsy an-daniny anefa dia misy koa ny ampahany amin’ny foloalindahy toy ny Komanda Roger Luc sy ireo manamboninahitra lefitra eo anivon’ny FIGN na Hery vonjy taitran’ny Zandary izay mitsipaka ny fandraisana anjaran’ny tafika amin’ny fahefana mpanatanteraka. Manao antso avo amin’ny tafika, araka izany, i Lalatiana Ravololomanana, mba tsy hiditra amin’ny fifampiandaniana ka hikatsaka miaraka ny famerenana ny hasiny amin’ny maha tandroka aron’ny vozona azy. «Ny fanerena ireo mpanao politika amin’ny fifampidinihana no anjara andraikitra tokony hataon’ny tafika. Sady hampisara-bazana anareo miaramila mantsy ny fisian’ny fizarazarana no tsy hahazoana ny fankatoavana iraisam-pirenena akory», hoy i Lalatiana Ravololomanana. Miantso an’i Andry Rajoelina koa izy hanetry tena ka hiaiky fa tsy mahavaha olana ny tenany ary hiverina hifampidinika an-databatra boribory miaraka amin’ireo ankolafy efatra sy ireo firehana hafa ihany koa. Ny fiaingana amin’ny foto-pisainan’i Maputo sy Addis Abeba no fomba tsotra indrindra itondrana ny dinika amin’izany raha ny fanazavany ihany.

Tia Tanindrazana

Samia mijoro ho an'i Gasikara.