Politique

Partagé sur :
• facebook

Mila ho isan’andro vaky izao no andrenesana vaovao momba ny miaramila eto amintsika. Niezaka ny nanazava ny sain’ny olona ny amin’ireny karazana vaovao sy resaka miparitaka etsy sy eroa ireny moa ny tompon’andraikitra avy eo anivon’ny foloalindahy, ary indraindray aza izy ireo dia manome tsiny ny mpanao gazety ho mpampiady sy mpanely tsaho.

Raha ny tena marina anefa dia ny hitsikitsika tsy mandihy foana, fa ao raha ! Misy ny tsy fitovian-kevitra eo amin’ny samy miaramila, ary efa tafiditra ao amin’ny foloalindahy ny politika sy ny vola. Izay raha tsorina ny zava-misy. Misy matetika ny fihaonan’ny manamboninahitra, amina toerana maro samihafa, na any anaty lakazerina io, na any amina tranona’olon-kafa. Araka ny tsiliantsofina re dia leo amin’ny fomba fiasan’i Andry Rajoelina sy ny fitarazohan’ny krizy ny ankamaroan’ny miaramila, eny fa na dia ireo niara-niasa taminy aza. Ka misy ny fikarohana vahaolana hafa, rehefa tsy havoakan’i Andry Rajoelina ihany ny baolina. Tato ho ato indray izao, dia mahoraka be mihitsy fa misy trakta mangataka ny fametraham-pialan’ny jeneraly Noel Rakotonandrasana, minisitry ny fiarovam-pirenena any anaty lakazerina any. Ity manamboninahitra ity moa dia ambaran’ireo mpiara-miasa akaiky amin’i Andry Rajoelina fa miray tendro amin’ireo andiana mpanao politika mieritreritra ny hanongana izao tetezamita izao. Efa nanambara anefa ny jeneraly Noel Rakotonandrasana fa tsy mikotrika fanonganam-panjakana ny tenany. Izany rehetra izany no manaporofo fa misy zavatra tsy milamina ary vao miha lasa olana goavana isan’andro eo anivon’ny foloalindahy sy ny fitantanana ny firenena amin’ny ankapobeny. Efa nambara teto ihany fa maro ireo tompon’andraikitra ambony no efa tsy dia mitovy tadin-dokanga firy intsony amin’ny filohan’ny HAT. Misy amin’izy ireo aza no tsy tafiditra an-dapa intsony.

Tia Tanindrazana

Samia mijoro ho an'i Gasikara.