Politique

Partagé sur :
• facebook

Tsy tafavoaka ny baolina, ary mieritreritra paikady hafa indray i Andry Rajoelina sy ireo mpanolotsaina azy. Araka ny tsiliantsofina re dia mety hivadi-dela (tahaka ny fanaony) indray ato ho ato ny filohan’ny HAT, ka hanaiky ny hifampidinika amin’ireo lehiben’ny ankolafy 3 sy ny mpanelanelana.

Iaraha-mahita mantsy ankehitriny fa vahaolana miteraka olana iray vaovao foana no avoakan’ny tetezamitan-dRajoelina ka vao mainka mampitombo ny fahorian’ny firenena sy ny vahoaka. Tafidi-kizo tanteraka ary mety latsaka anatina vela-pandrika mihitsy, araka ny filazan’ny mpandinika politika iray taminay, i Andry Rajoelina. Araka ny fanazavany mantsy dia : «efa fantatr’ireo mpanohana an-dRajoelina sy ireo mpanome toromarika azy fa tsy tafavoaka ny firenena ary tsy hisy mihitsy ny faneken’ny sehatra iraisam-pirenena ny tetezamita mijoro eo, raha tsy ampiharina ireo fifanarahana iraisam-pirenena nosoniavin’ny lehiben’ny ankolafy 4, tsy inona izany fa ny satan’i Maputo sy ny fifanarahana tovana tany Addis Abeba. Mikaroka hevitra hafa ihany izy ireo saingy tsy nety tafavoaka. Rehefa fantany fa halohalika ny ranom-bary dia manao tahaka ny fanaon’ny mpilalao politika efa zatr’ady izy ireo dia ny fanilihana ny andraikitra any amin’olon-kafa. I Andry Rajoelina no olon-kafa tian-kambara eto». Midika izany fa ho tavela irery sy ho hitan’ny havany eo, araka ny fomba fiteny i Andry Rajoelina raha tsy mahay manapa-kevitra tsara, satria efa manana traikefa amin’ny famadihana palitao avokoa ireo olona manodidina azy. Na ahoana na ahoana endriky ny sori-dalana avy amin’ny HAT, dia ho sarotra ny fampiharana azy raha tsy manaiky ireo ankolafy telo sy ny sehatra iraisam-pirenena ka izay no mety haharesy lahatra an’i Andry Rajoelina mba hiverina hiara-hidinika amin’ireo filohan’ny ankolafy telo.

Tia Tanindrazana

Samia mijoro ho an'i Gasikara.