Politique

Partagé sur :
• facebook

Nahafinaritra ary nahavelombolo, araka ny fanambaran’ireo mpikarakara, ny fiaraha-mientan’ireo Malagasy tia tanindrazana maro avy amin’ny lafy valon’i Lafrantsa sy Belzika, ary koa ireo avy ao amin’ny Ile de France, izay nanao hetsika lehibe, tao Parisy Place de la Nation ny sabotsy 13 martsa lasa teo.

Tonga naneho ny fanohanana ny ara-dalàna sy ny fiverenan’ny filoha Marc Ravalomanana ho eo amin’ny fitondrana, hanohy ny asa natombony izy ireo. Asa nahitan’ny Malagasy taratra ny fandrosoana, nanomboka nanarina ny toe-tsaina gaboraraka teo aminy, vokatry ny taizan’ny fanjanahana ara-batana, ara-tsaina ary ara-panahy. Ny zava-bita moa dia tsy tantaraina intsony (lalana, fianarana, fahasalamana...), fa efa tena maro dia maro tokoa, ary nihoatra lavitra noho ny hita rehetra hatrizay. Nankahery ny mpitolona tamin’ny alalan’ny fifandraisana an-tariby ny filoha Marc Ravalomanana, izay nankasitrahana sy nihobian’ny mpitolona teo amin’ny Place de la Nation.

Tsy nohadinoin’ny mpitolona koa ny fisaorana ny firenena Afrikanina tatsimo (teo ny sainany), nampiantrano ny filoha no koa nanampy ny tolon’ny Malagasy. Io firenena io mantsy dia mahatakatra tsara izany tolona ho an’ny fahafahana izany, satria efa nandalo izany am-polony taona, ary tsy azon’ny Frantsafrika atao ohatr’ireo tany afrikanina frankôfôna, voatsindry ao amin’ny fanjanahana an-kolaka. Nofaranana tamin’ny fiaraha-manala hetaheta sy fiaraha-misakafo ny fotoana mba hifankahalalana bebe kokoa sy hitohizan’ny tolona ao anaty firahalahian’ny Tia Tanindrazana rehetra.

Tia Tanindrazana

Samia mijoro ho an'i Gasikara.