Politique

Partagé sur :
• facebook

“Hanenina foana izay misaraka amintsika”, hoy i Joachim solontenan’ny mpitolona avy any Mahajanga. Fotoanan’ny fandresena izao, hoy izy ka samia mifaly. Tsy nofoanana ny hetsika tao amin’ny kianjan’ny Finoana Magro Behoririka na dia nisy aza ny fivoriana fiaraha-mientana nataon’ny Ankolafy Telo ao amin’ny Carlton Anosy ny zoma 13 sy sabotsy 14 aogositra.

Ato amin’ny kianjan’ny finoana ihany ahitana vahaolana hialana amin’ny krizy, hoy ny Pasteur Edouard (Ankolafy Zafy Albert), matoa mbola misy olona ato. Mitodika ato ny mason’izao tontolo izao ka aoka ho mendrika amin’izany isika, hoy izy. Tonga eo amin’ny kihon-dalana lehibe isika izao ka mahaiza mamindra sao dia ho lasa any amin’iny lalana iny izay lalan-diso tanteraka. Marihina fa tsy dia tazana tao amin’ity kianjan’ny Finoana ity tao anatin’ny fotoana naharitraritra ihany izao (efa am-bolana vitsivitsy) ny mpitari-tolona mpandaha-teny malaza toa an-dry Camille Mektoub sy Tabera Randriamanantsoa samy avy amin’ny Ankolafy Zafy Albert. Ny antony, araka ny fanazavana azo dia mamita iraka any amin’ny Faritra ivelan’Antananarivo izy ireo manazava amin’ny olona ny tena zava-misy marina amin’ny fiatrehana ny tolona aty Antananarivo. Politikan’ny Ankolafy Zafy Albert manokana ny manatona ifotony ny vahoaka mitondra izany fanazavana izany. Mananjary no fari-piadidiana nandehanan’i Camille Mektoub ary mbola hamonjy azy any koa Ingahy Tabera rehefa mandalo vetivety eto Iarivo ankehitriny. Miandry ny tena mpitari-tolona ny mpanao fihetsiketsehana fa ny nampahomby ny tolona hatramin’izany na tsy maintsy misy aza ny fivoriana atrehana isan’andro dia tsy maintsy tonga eny an-kianja mamarana ny kabary hatrany ny tena mpitarika azy. Toy izany no niseho tamin’ny tolona 72 sy 91 ary ny taona 2002 sy 2009. 

Tia Tanindrazana

Samia mijoro ho an'i Gasikara.