Politique

Partagé sur :
• facebook

Mafanafana ny toe-draharaha politika ao Toliara taorian’ny nisamboran’ny mpitandro ny filaminana ireo mpitarika fihetsiketsehana fanoherana ny tsy rariny sy fanapenam-bava ny vahoaka tsy haneho ny heviny, nitranga tao Toliara ny zoma 27 aogosotra teo ka niteraka fahapotehan’ny fitaovana sasantsasany tao amin’ny radio Soatalily.

Voasambotra ny faran’ny herinandro teo i Evaharane Torimana (filohan’ny antoko Fanasin’i Madagasikara), Patita Lentera (mpanao ady totohondry), Papa Rakotovao Tsimananjoky (filohan’ny fikambanana Masikoro), Rafilo Jean Felista (mpanolotsaina monisipaly Toliara I), Rabeony Mandridake (mpandraharaha) ary i Sazalahy. Araka ny fantatra anefa dia milaza ny hidina an-dalambe, hitaky ny famoahana ireo olona nosamborina ireo ny Herim-bahoaka Mitambatra (HBM) anio. Fantatra ihany ny ao Toliara rehefa misy fihetsiketsehana izay. Ahiana, araka izany, ny hisian’ny sakoroka eo amin’ny mpanao fihetsiketsehana sy ny mpitandro ny filaminana, tsy ferana koa anefa ny mpanararaotra.

Tsiahivina fa tao amin’ny kianjan’ny demokrasia amoron-dranomasina no saika hanaovan’ny HBM fihetsiketsehana ny zoma teo saingy efa feno miaramila mialoha izany toerana izany. Niezaka niresaka tamin’ireo miaramila ihany ny profesora Elindraza Mandridake, izay karohin’ny mpitandro ny filaminana fatratra ihany koa amin’izao fotoana, saingy tsy vita akory ny dinika dia nirefotra ny grenady. Tezitra noho izany ny mponina tany an-toerana ka nanehoan’izy ireo ny hatezerany ny Radio Soatalily, na RNM ao an-toerana. Nisy nanararaotra izany ka naka ny fitaovan’ny radio, toy ny «camera» sy ny ordinatera isan-karazany. Ny sasany namoaka ny entana sasany teny an-tokotany ka nandoro izany. Nanao be fiavy ireto andian’olona ireto ka izay no anton’ny tsy nahafehezan’ny mpitandro ny filaminana tany ity toe-draharaha ity. 

Tia Tanindrazana

Samia mijoro ho an'i Gasikara.