Politique

Partagé sur :
• facebook

Naneho ny heviny momba ny fitsarana ny raharaha 7 febroary ny GTT Ile de France (IDF). Lavin’ity farany tanteraka ny didy navoakan’ny fitsarana ady heloka tsotra ny sabotsy 28 aogositra teo, satria amin’izy ireo dia tsy manana ny fahefana hitsara ny filoham-pirenena io sampam-pitsarana io fa anjaran’ny “Haute Cour de Justice” ihany izany.

Manoloana izany indrindra dia lavin’ny GTT IDF tanteraka ny fampiasana ny fitsarana ho fitaovana hanilihana ny filoha Ravalomanana eo amin’ny sehatra politika. Fanilihina ny filoha Ravalomanana tsy afaka hilatsaka amin’izay fifidianana ho filoham-pirenena ho avy eo iny didim-pitsarana iny, hoy ihany ny GTT IDF ka “tsy azo ekena”. Etsy andanin’izany dia lavin’ity fikambanan’ny Malagasy zanaka ampielezana any Frantsa ity koa ny filazan’ireo mpomba an’i Andry Rajoelina sasany fa hetsi-bahoaka no nahatongavany teo amin’ny fitondrana. Tsiahivina, hoy ny GTT IDF ny naha hipoka tanteraka ny Kianjan’i Mahamasina ny 11 sy 14 febroary 2009 izay nanamafisan’ny vahoaka ny fahatokisany sy ny fankatoavany ny filohan’ny Repoblika lany tamim-pomba demokratika dia i Marc Ravalomanana, ary nanoheran’ireo vahoaka ireo ny tetika fanonganam-panjakana efa nokotrehin-dRajoelina tamin’ny fotoana. Takianay, hoy ny GTT IDF ny hisiana fitoniana mialoha ny hanohizana izay mety ho karazana dinika, toy ny fampitsaharana ny raharaham-pitsarana rehetra ny fandrahonana manana endrika politika, ny famoahana ireo gadra politika rehetra sy ireo mpanao gazety, ary ny fanekena ny teny fampidirana amin’ny satan’i Maputo izay manohitra ny herisetra nefa mampirisika ny fandeferana, fampihavanana ary fifanajana. 

Tia Tanindrazana

Samia mijoro ho an'i Gasikara.