Politique

Gadra politika Marary mafy ny 2, ny 1 hafa tsy mahateny intsony

Politique
Alakamisy 08 Aprily 2010

Rehefa nahatsiaro fa tsy noraharahaina ary nohitsakitsahina mihitsy aza ny zon’izy ireo dia nanapa-kevitra ireo gadra politika 18 voafonja eny Tsiafahy fa hanao fitokonana tsy hihinan-kanina. Araka ny vaovao àry dia marary mafy ny 2 amin’izy 18 ireo, ny 4 reraka tanteraka ka ny 1 amin’ireo 4 ireo dia taizan’aretina, ny 1 hafa kosa dia tsy mahateny intsony, araka ny vaovao ihany. Raha ny fanazavan’ny fianakavian’ireo voafonja politika dia tsy ny eny Tsiafahy ihany no mitokona tsy misakafo fa ireo 30 mahery eny Antanimora ihany koa. Ho an’ireo fianakaviana moa dia voalaza fa tandindomin-doza ny fiainan’izy ireo sy ny fiainan’ireo voafonja. Efa misy tamin’ireo voafonja ireo no efa voatazona teny nandritra ny 11 volana kanefa tsy mbola nisy fanadihadiana na koa fitsarana. Tsy nanara-dalàna na ny nitazomana azy ireo na ny nisamborana azy ireo. Nandefa taratasy any amin’ireo fikambanana iraisam-pirenena isan-tokony moa ny fianakavian’ireo voafonja hanairana momba ny zava-misy eto amin’ny firenena satria tandidonin-doza ny havany ary tsy ny havany ihany fa ny fiainan’ny fianakaviana mipaka hatramin’ny firenena manontolo.

Nangonin’i Soa