Politique

Partagé sur :
• facebook

Tonga ny fotoana hanehoana ny hery ho an’ny mpiasam-panjakana. Raikitra ihany koa ny fitokonana faobe ataon’izy ireo manomboka ny talata 12 oktobra izao araka ny baiko nomen’ny (F3M) Fiaraha-mientan’ny mpiasam-panjakana izay ivondronan’ny sendika sy fikambanana 30 ary misy ny sokajin’asa rehetra.

 “Rehefa nohenoina ny hetahetan’ny mpiasa rehetra hatrany amin’ny Faritra dia hatsahatra ny asa manomboka amin’ny talata izao manoloana ny fanaovana ankilabao sy tsinontsinona ny mpiasampanjakana ary ny bemarenina ataon’ny mpitondra”, hoy ny fanambarana nosoniavin’ireo mpitarika sendika sy fikambanana ao amin’ny F3M. Nanamafy i Celestin Randrianarivonizandriny fa tsy mijanona ny fitokonana raha tsy azo izay takiana. Tsy nanambara ny endrika isehoana kosa anefa ireo mpitarika satria ao anatin’ny paikady izany. “Amin’ny talata fa tsy alatsinainy no hanomboka ny hetsika ho fanajana ny lalàna izay mamaritra fa mila ampahafantarina ny fitokonana hatao 48 ora mialoha ny fanjakana” raha ny fanazavana ihany. Ny fangatahana ny fampitoviana ny marikarama ho an’ny mpiasam-panjakana mitovy sokajin’asa sy mitovy mari-pahaizana araka ny andiny faha-28 sy 34 amin’ny 2003-11 ao anatin’ny sata mifehy ny mpiasam-panjakana no fototry ny fitakian’ny F3M hatramin’ny volana martsa 2010.

Nisy hatrany ny fampanantenana fa havoaka mialoha ny fetin’ny 26 jona 2010 teo ary mbola nahemotra ny volana aogositra indray avy eo ny didim-panjakana momba izay. Ankoatra izay dia nambara koa fa hakarina iray hetsy ariary ny tambikarama momba ny hofan-trano ary iray alina ariary ny volan-jaza. “Tsy misy tanteraka anefa ireo fa fampandrina adrisa avokoa no natao ka izao tonga amin’ny hetsika izao”, hoy i Florentin Ramamonjisoa, filohan’ny FMMD. Nampitandrina kosa i Tsialofana fa tsy tomponandraikitra amin’izay zavatra hiseho ny F3M raha nanamafy kosa ny sasany fa tsy misy mpanao politika ao ambadiky ny hetsika fa lainga aelin’ny onjampeo iray eto an-drenivohitra izany handotoana ny fiaraha-mientana.

Tia Tanindrazana

Samia mijoro ho an'i Gasikara.