Politique

Partagé sur :
• facebook

Tsy misy heviny sady toy ny tsy nisy ny fitsapan-kevi-bahoaka notontsosain’ny FAT ny alarobia 17 novambra teo raha ny fanambaran’ny AMA na ny Fikambanan’ny Ben’ny tanàna eto Madagasikara.

Amin’izy ireo dia vao mainka hamboly krizy vaovao ny fanatontosana iny fifidianana «tandrametaka sy kitoatoa» iny. «Sambany no nisy teto amintsika izany fahafaha-mandatsa-bato amin’ny alalan’ny kara-pokontany izany», hoy Ralaiseheno Guy Maxime, filohan’ny AMA. Ho an’ity fikambanana ity dia ny fametrahana ny fitondrana tetezamita tena izy sy tsy mitanila ihany no vahaolana amin’izao krizy lalina izao ka takiany ny fihaonana an-databatra boribory eo amin’ireo filoha telo lahy sy ny filohan’ny FAT. Araka izany dia mitaky ny fiverenan’ireo filoha roa lahy sesitany dia Didier Ratsiraka sy Ravalomanana Marc an-tanindrazana ny AMA. «Sady olana no vahaolan’ny firenena izy efatra mirahalahy mianaka ireo ka izay no antony tokony hiverenany midinika eto an-tanindrazana mba hananganana ny fanjakana marin-toerana, manaja ny demokrasia ary hirosoana ihany koa amin’ny fampihavanam-pirenena tena izy», hoy Randrianandrasana Pascal, filoha lefitry ny fikambanan’ny ben’ny tanàna faritra Menabe.

Efa manana vahaolana hafa koa anefa ny AMA raha tsy tontosa io tolokeviny io noho ny fizirizirian’ny FAT. «Izahay Ben’ny tanàna sisa no rafitra ara-dalàna eto amin’ny firenena ka izahay ampian’ny vahoaka Malagasy no hametraka amin’ny toerana ny filoha izay mahafeno ny fepetran’ny tsy fitanilana raha mitohy io fiziriziriana io», hoy Ralaiseheno Guy Maxime. Hatramin’ny rahampitso sabotsy moa no fe-potoana omen’ ireto Ben’ny tanàna ireto ny FAT amin’izany. Tsy nety nanome fanazavana momba ilay olom-pirenena harosony eo amin’ny toeran’ny filoha kosa anefa izy ireo. Nohazavain’ny filohan’ny AMA koa fa tsy misy ifandraisany amin’ny fikasana fandraisana fahefana ataon’ny miaramila ny hetsika ataon’izy ireo saingy ny itovizany dia ny fikatsahana ny fampihavanam-pirenena amin’ny alalan’ny fifamelana faobe. 

Tia Tanindrazana

Samia mijoro ho an'i Gasikara.