Politique

Partagé sur :
• facebook

Araka ireo fifanarahana politika teny Ivato sy natao farany teo teny Vontovorona dia ny alatsinainy 13 septambra ho avy izao, izany hoe afaka herinandro katroka no hanatanterahana ny fihaonambem-pirenena, handravonana ireo soso-kevitra isan-karazany ho amin’ny fametrahana ny Repoblika faha-4.

Araka ny tombantombana dia manodidina ny 2000 eo ho eo ny mpandray anjara amin’izany. Hatramin’izao aloha dia dimy andro no mety ho faharetan’ny fihaonambem-pirenena, raha ny lamina napetraka hatrizay no arahana. Anisan’ny hifanakalozana sy hiadian-kevitra mandritra izany ny momba ny lalàmpanorenana, ka mandritra io fotoana io no hampahafantatra ireo hevi-dehibe nisongadina tamin’ireo tolo-kevitra rehetra voarainy ny Komity fakan-kevitra momba ny lalàmpanorenana na CCC. Tsy maintsy horesahana mandritra ity fihaonambe ity ihany koa ny mikasika ny famotsoran-keloka, ny fampihavanam-pirenena, ary ny lalàna mifehy ny fifidianana sy ny antoko politika. Efa nisy ny Dinika Santatra, teo ihany koa ireo fihaonana teo amin’ny ankolafy politika maro samihafa, saingy nijanona ho fakan-kevitra ihany ireny, fa mandritra ny fihaonambem-pirenena vao tena hisy ny fanapahan-kevitra, na ny famoahana izay hevitra eken’ny maro an’isa.

Ka ny tena andrasan’ny maro fatratra dia izay mety ho endriky ny volavolan-dalàmpanorenana, atolotra ny hisafidianan’ny vahoaka amin’ny fitsapan-kevi-bahoaka. Na dia efa mipetraka aza anefa ny fandaharam-potoana, dia maro ihany no sahiran-tsaina ny amin’ny tena ho fizotry ny dinika, satria hita sy tsapa fa mbola maro ireo hevitra mifanipaka, na eo amin’ny samy fiarahamonim-pirenena io, na eo amin’ny antoko sy firehana politika. Mbola tsy fantatra mazava ihany koa hoe : ny tolo-kevitra avy aiza marina no hodinihana mandritra ny fihaonambem-pirenena ? Ny avy amin’ireo fihaonambem-paritra nokarakarain’ny CSR-AN sy ny Teny Ifampierana tamin’ny herintaona ve, sa ny avy amin’ny Dinika Santatra, sa ireo hevitry ny mpanao politika nivory teny Ivato sy Ambohidahy ary Vontovorona ? Etsy ankilan’izany dia mbola misy ireo mieritreritra ny hanao fihaonana, hafa indray ho fanangonan-kevitra, mialoha ny fihaonambem-pirenena. Midika izany fa tena mbola sarotra ny fanohizana ny fikaroham-bahaolana amin’ny krizy, ary samy mandrirotra amin’izay itiavany azy ny raharaha ireo fikambanana sy antoko politika, ary manana ny fomba fijeriny ihany koa ny fiarahamonim-pirenena. Manampy trotraka izany ny tsy mbola mampazava ny fomba hitantanana ny tetezamita, noho ny ady seza eo amin’ny antoko sy ankolafy tsirairay avy, ary ny sangodim-panina ataon’ireo mpanao politika. 

Tia Tanindrazana

Samia mijoro ho an'i Gasikara.