Politique

Partagé sur :
• facebook

Any amin’ny volana aogositra, aorian’ny fikaonan-doha manerana ireo distrika no mety hanatanterahana ny fihaonambem-pirenena izay handraisan’ny maro an’isa anjara.

Araka izany dia tokony hiavaka amin’ny fivoriana rehetra nisy hatramin’izay izy ity ary tena ahitana taratra marina ilay hoe : fiaraha-mientana sy fandraisan’anjaran’ny ankolafy sy ny firehana rehetra. Ny avy ao amin’ny vondron’ny fiarahamonim-pirenena izay eo ambany fiahian’ny komitim-pirenena momba ny fampihavanana (CNR) no hikarakara ity fihaonambem-pirenena ity, araka ny tsiliantsofina re. Lohahevitra fito no fantatra fa mety hodinihana sy hiadian-kevitra amin’izany, dia ny fandrafetana ny lalàmpanorenana vaovao, ny momba ireo filoham-pirenena teo aloha, ny lalàna momba ny antoko politika, ny mikasika ny antoko mpanohitra, ny lalàna mifehy ny fifidianana, ny CENI ary ny fampihavanam-pirenena.

Anisan’ny antony nampihemorana ny dinika santatra sy fikaonan-doham-pirenena saika notanterahana farany teo moa no hanaovana ny fifampiresahana sy fifanatonana eo amin’ireo ankolafy rehetra mba hampitoviana ny tadin-dokanga sy hikarohana ny marimaritra iraisana amin’ny fikarohana vahaolana eo amin’ny samy Malagasy. Fa teo ihany koa ny fisian’ireo fitsidihana nataon’ny mpanelanelana avy amin’ny sehatra iraisam-pirenena, izay mbola hitohy ato ho ato sy amin’ny fiandohan’ny volana jolay. Araka ny feo re dia manomboka efa hita soritra kely ihany ny marimaritra iraisana eo amin’ireo ankolafy maro samihafa ary mbola hitohy ny dinika savaranonando. Raha mizotra araka ny tokony ho izy izany ary mihena tsikelikely eny ireo hevitra tsy nampifanaraka hatramin’izay dia mety ho vita eto an-toerana ihany fa tsy ivoahana any ivelany intsony ny famahana ny krizy. Na izany aza anefa, mbola sarotsarotra ihany ny adihevitra, indrindra fa momba ny fampihavanam-pirenena sy ny famotsoran-keloka ary ny momba ireo filoha teo aloha. 

Tia Tanindrazana

Samia mijoro ho an'i Gasikara.