Politique

Partagé sur :
• facebook

Tontosa omaly ny atrikasa ho fiaraha-miasan’ny vaomiera mahaleotena misahana ny fifidianana (CENI) sy ny Fikambanan’ny maintimolalin’ny sekolim-pirenena manofana ho mpitantan-draharaham-panjakana any Frantsa (AAENA).

 Nifantohana ny lohahevitra mikasika ny «fanentanana ireo vehivavy sy tanora mikasika ny anjara adidiny amin’ny maha olom-pirenena azy ireo amin’ny fisoratana anarana ao anaty lisi-pifidianana». Tafiditra ao anatin’ny fanentanana nasionaly sy ny fampahafantarana ny pitsopitsony, mba hananana tambajotra hifanakalozam-baovao amin’ny fanentanana ara-pifidianana sy hanaovana serasera mikasika ireo olana mety hitranga. Nasaina manokana ireo fikambanana liana amin’ny fandraisana anjara amin’ny fanentanana ara-pifidianana sy ny fanisana mpifidy. Tanjona ny hahafahan’izy ireo mampita ireo pitsopitsony tokony ho fantatra amin’ireo iantefany sy ny sarababem-bahoaka amin’ny maha zava-dehibe ny fisoratana anarana ao anaty lisi-pifidianana. Novelabelarin’ireo solontenan’ny fikambanana maintimolalin’ny ENA sy ireo teknisian’ny CENI ny lohahevitra manodidina ny olana sedrain’ny vehivavy sy ny tanora, ny serasera amin’ny tambanjotran-tserasera ara-tsosialy ary ny mikasika ny fifididianana. Noresahina tamin’ny asam-baomiera kosa ny fomba hanatanterahana ny paikadim-pirenena hanentanana ny olom-pirenena hiteraka fahatsapan-tena mizotra any amin’ny latsa-bato, izay lavitry ny fanilikilihana.

Toky R

Tia Tanindrazana

Samia mijoro ho an'i Gasikara.