Politique

Partagé sur :
• facebook

«Ankasitrahana ny vahaolana naroson’ny SADC toy ny tsy miantsy hiraisana sy tenierana, tsy ilaina ary tsy mety kosa anefa ny fisiana taratasy toy ilay nataon’ny Dr Salomao, tsy mifanaraka amin’ny fehin-kevitr’ireo filoham-panjakana eo anivon’ny SADC sy ny fanambaran’ingahy Simao teny am-pahatongavana teny Ivato fa vao mainka manakorontana. Manampahaizana manokana tsy miandany no tokony halefan’ny Sadc aty».

 Santionany amin’ny fanambaran’ny Alliance des Organisations de la Société Civile io raha nitafa tamin’ny mpanao gazety izy ireo omaly. Momba ny resaka SADC dia nohamafisin’ny Alliance fa tsy ny fanampian’ny vahiny no olana fa efa nisy fanapahan-kevitra noraisana filoham-panjakana tany Sandton. Noho izany, tsy ny mpiasa, dia ny Dr Tomaz Salomao izay tonia mpanatanteraka na ny Dr Leonardo Simao no hanova na ho lasa mpanapa-kevitra fa ireo filoham-panjakana. Tsy amin’ny anaran’ny SADC no nahatongavan’ingahy Simao eto, hoy ihany ny Alliance fa iraky ny tonia Salomao izy. Raha olona hanakorontana ny famahana ny krizy, hoy ny fanazavana dia ialana tsiny. Ho an’ny Alliance, araka ny fanazavan’ny mpitondra teniny, Ndriandahy Mahamoudou dia ny fanelanelanana eo amin’ny samy Malagasy ihany no hany fomba hamahana ny krizy eto Madagasikara.

Hery telo no hampahomby izany fanelanelanana izany, raha ny fanazavany, dia ny fianakaviambe iraisam-pirenena, ny foloalindahy ary ny fiarahamonim-pirenena. Ny zava-misy anefa dia mivaky ny fianakaviambe iraisam-pirenena, ny foloalindahy koa manana olana kanefa ny vahoaka izay akaiky indrindra ny fiarahamonim-pirenena dia tra-pahasahiranana mafy. Ankoatra izay dia ny sakana goavana amin’ny fanelanelanana ny resaka fizaran-tseza sy ny tsy fanekena sy tsy fanarahana ny zavatra efa tapaka izay nifanarahana. Vonona hiroso hatrany amin’ny fanelanelana ny firaisamonim-pirenena saingy miankina amin’ny fahavononan’ny rehetra ny ho fahombiazan’izany. Raha ankinina amin’ireo mpanao politika mantsy ny fitadiavam-bahaolana, hoy izy ireo dia tsy hisy mihitsy. Momba ny fahatongavan’ireo diplomaty teny Mahamasina ny 26 jona lasa teo kosa dia tsy midika fankatoavana velively ireny, ho an’ny Alliance.

Tsy maintsy miaraka amina taratasy mantsy izany fankatoavana izany raha ny fanazavana ihany. Ankoatra izay dia fantatra fa hisy ny karazana fihaonam-paritra hataon’ireo mpikambana eny anivon’ny renivohi-paritany enina hifampizarana vaovao ny 8 sy 9 jolay ho avy izao. Vaovao diso, tsy mifanaraka amin’ny tena zava-misy marina mantsy no tonga any amin’ny Faritra, hoy ihany i Ndriandahy Mahamoudou ka izay no tsy maintsy hifampizarana sy hampahafantarina ny marina, noho ny tsy fisian’ny fahalalahana miteny eto amintsika. Tsy mbola fantatra kosa aloha hatreto ny daty hanaovan’ny fiarahamonim-pirenena ny andiany faharoa amin’ny fanelanelanana izay hotarihin’ny CNOSC izay tohanan’ny Alliance ny asany.

Soa 

Tia Tanindrazana

Samia mijoro ho an'i Gasikara.