Politique

Partagé sur :
• facebook

Tsy azo ekena ny fandehanana amin’ny lalan-tokana, hoy ny mpitarika ny fanelanelanana amin’ny famahana ny krizy eto Madagasikara, ny filoha mozambikanina teo aloha, Joachim Chissano.

Tsy misy afa-tsy tetezamita iombonana, iarahan’ny rehetra no lalana hivoahan’i Madagasikara, hoy ihany i Chissano. Araka izany dia manery ireo mpitarika politika malagasy rehetra ny tenany hiverina an-databatra boribory hiara-hamaritra izay sori-dalana heverina fa hiverenan’i Madagasikara amin’ny ara-dalàna. Ao anatin’izany ny tetiandro mifanaraka araka ny tokony ho izy, izay hifanarahan’ny rehetra. Raha ny fanazavana dia mino tanteraka ny mpanelanelana fa ny tenierana ihany no hany lalana. Manoloana izany ary dia tokony hirosoana ny fampihavanana sy ny fifampidinihana amin’ny famerenana ny ara-dalàna. Ao anatin’izany ny fanaovana ny fifidianana, ny fametrahana ny governemantan’ny tetezamita ary ny vaomiera mahaleo tena hisahana ny fifidianana izay hiandraikitra ny fanomanana amin’ny ankapobeny ny fifidianana. Izany dia mba hahafahana miantoka fifidianana mangarahara, malalaka, azo antoka ary inoan’ny rehetra. Nohamafisin’i Joaquim Chissano fa ny fifampidinihana sy ny fahitana marimaritra iraisana ihany no tokony hizorana hahatongavana any amina vahaolana maharitra ho tombontsoa ambonin’ny firenena Malagasy. Na dia eo aza ny fahasarotana dia naneho fahavononana hatrany ireo mpanelanelana hanohizana ny dinika hitadiavana vahaolana amin’ny marimaritra iraisana.

Tia Tanindrazana

Samia mijoro ho an'i Gasikara.