Politique

Partagé sur :
• facebook

Mihozongozona amin’ny toerany ny Tale jeneralin’ny SPAT Toamasina.

 Ny fanaovana sonia ny didim-panjakana momba izany sy ny fampahafantarana azy ampahibemaso fotsiny sisa no andrasana, raha tsy hoe hihemotra amin’ny ora farany ny FAT. Resaka politika no antony, araka ny loharanom-baovao samihafa. Teo ny fampiantranoan’ny Foyer Social Canada ny hetsiky ny ankolafy Ravalomanana ny 30 jolay 2011, na nandoavana vola ara-dalàna (150.000 Ar.) toy ny mpanofa rehetra aza ny trano ny 29 jolay 2011, ary nanaovana fifanarahana ara-dalàna ny 28 jolay, izay voasonian’ny tompon’andraikitry ny Foyer Social Canada ny 29 jolay ary nanaovana fangatahana izay nankatoavin’ny mpitantana ny fananan’ny Port Toamasina ny 27 jolay. Vokatr’io fampiantranoana ny ankolafy Ravalomanana io, izay nambara fa tsy azo anaovana hetsika politika ny tranom-panjakana na tokotany malalaka tahaka ny nahazo ny talen’ny CEG Radama I izay voatery nalana, dia nitory ny mpikambana eo anivon’ny ankolafy nanao sonia ny fifanarahana ny Tale jeneralin’ny SPAT ho fiarovan-tenany. Talohan’izay mantsy dia nanaovan’ny DST in-droa nisesy ny fisavana ny kaontin’ny SPAT fa hoe : “mamatsy vola ny ankolafy Ravalomanana”, ka io fitoriana nataony teo anivon’ny polisin’ny seranan-tsambo io no fialany ary tsy maintsy nataony ho fiarovan-tenany.

Nenjehina noho ny “fanaovana fivoriana politika tsy nahazoana alalana teo anivon’ny tranon’ny SPAT ny ankolafy Ravalomanana” i F.R. nanao ny fifanarahana izay neken’ny seranan-tsambo tany am-boalohany. Tsy nifarana tamin’izay ny raharaha fa nitarina ho lasa “fivadihana tamin’ny fifanarahana natao indray” aty aoriana, satria nanomboka ny zoma lasa iny, nitohy ny alatsinainy sy ny talata teo ny fanadihadian’ny kaomisarian’ny seranan-tsambo, ary teo no nisy taratasy fanampiny ilay nifanaovana sonia mikasika ny fepetra amin’ny fampiasana ny trano, nefa nandritra ny sonia natao ny sabotsy 30 jolay teo amin’ny mpanofa sy ny mpampanofa, dia efa nipetraka tao anaty efitrano ny sorabaventy na “banderole” sy ny ravaka samihafa ary ny seza maro, nefa tsy nisy ny sakana teo amin’ny seranan-tsambo nampanofa malalaka ny tranony ho an’ny ankolafy Ravalomanana.

Ho hita eo ny ho tohin’ny tantara, fa ny Tale jeneralin’ny SPAT aloha eto no atao lasibatra amin’ny fanovana tian’ny FAT hapetraka sy ny fampiharana ny politika avo lenta. Handrasana koa ny ho fanapahan-kevitry ny mpitsara mpanao famotorana sy ny fampanoavana mikasika ny raharaha anenjehana an’i F.R. momba ny fitorian’ny Tale jeneralin’ny SPAT tamin’ny fampiasana ny tranon’ny Port nanaovana io hetsika politika io.

Rakoutou

Tia Tanindrazana

Samia mijoro ho an'i Gasikara.