Politique

Fampandrosoana an�i Madagasikara Ny mpitondra no sakana, hoy i Tsarahame Edouard

Politique
Zoma 17 Febroary 2017

Nandalo tao Mahajanga ny mpitarika ny antoko Rodobe Malagasy Fanorenana Ifotony na ny RMFI ny sabotsy lasa teo.

Tsy mahavita ny asany amin’ny fitantanana an’i Madagasikara ireo mpitondra ka tokony hametra-pialana raha ny nambarany. Efa tena marary ny vahoaka Malagasy ary hatrany anaty vilany ny fahantrana, hoy izy ary porofon’izany ny fisondrotan’ny vidim-piainana, ny tsy fandriampahalemana. Tokony hametra-pialana ny filoha sy ireo mpiara-miasa aminy, hoy hatrany Pasitera Tsarahame Edouard fa mila olom-baovao i Madagasikara. Nambarany fa ny firaisamonim-pirenena no fositra mamotika sy mamitaka ny Malagasy ka mahatonga izao fahantrana lalina izao. Laviny tanteraka ny fanjakazakan’ny vahiny eto Madagasikara. Tsikaritra fa efa mirona sy mifantoka amin’ny fitadiavan-tseza avokoa ireo mpanao politika amin’izao fotoana izao ary efa manao fampielezan-kevitra amin’ny fomba samihafa. Tafiditra amin’izany ny fitetezam-paritra sy ny famoriana olona izay anisan’ny be mpanao tokoa ao Mahajanga. Tsikaritra ihany koa fa misy endrik’olona maromaro, olon-tsotra, ahitana azy avokoa ireo fivoriana politika rehetra.

Vahaniaina