Politique

Famahana ny krizy Miala nenina ny Amerikanina

Politique
Talata 02 Novambra 2010

“Efa ela loatra ny krizy, tonga ny fotoana hiverenana hidinika indray an-databatra boribory hahatongavana amin’ny tetezamita iraisana, tenierana, tsy mitanila”. Hatry ny omaly dia eto Madagasikara ny iraka avy amin’ny departemantam-panjakana amerikanina, tarihin’i Karl Wycoff, sekreteram-panjakana lefitra misahana ny raharaha afrikanina. Raha tsy misy ny fiovana amin’ny ora farany dia hanao fanambarana ofisialy ity iraka ity amin’ity anio ity, eny amin’ny tranon’ny masoivoho amerikanina eny Ambaranjana. Hihaona amin’ny mpanao gazety ihany koa ny tenany. Ao anatin’izany fandalovany eto Antananarivo izany dia mikasa ny hihaona amin’ireo mpisehatra politika rehetra ity iraka manokana avy amin’ny fitondrana amerikanina ity, ao anatin’izany i Andry Rajoelina, filohan’ny FAT.

Tsy mbola nahazo valiny momba izany moa ny tenany, araka ny vaovao avy amin’ny masoivoho amerikanina. Mbola tsy fantatra tsara koa ny mety ho fandaharam-potoanan’i Karl Wycoff. Hatreto aloha dia tena mbola sarotra ny hahita izay ho fiafaran’ny krizy na dia efa tena sempotr’izany aza ny vahoaka Malagasy sy ny toekarena. Asa ihany koa raha hanam-piniavana hiroso indray amin’izany dinika an-databatra boribory izany hizahana izay ho vahaolana maharitra ho an’ny firenena ireo mpanao politika sy ankolafy isan-tsokajiny hametrahana izay vahaolana tenierana sy maharitra.

Nangonin’i Soa