Politique

Partagé sur :
• facebook

Tokony hihazo an’i Italia amin’ity faran’ny volana jolay 2010 ity io diplaomaty io saingy mihitsoka eto noho ny resaka “visa”. Araka ny fantatra dia hentitra ny Italiana nilaza fa raha tsy mbola mahazo fankatoavana iraisam-pirenena ny governemanta sy ny fanjakana mijoro eto Madagasikara dia tsy hanome io «visa» io izy ireo, indrindra fa diplaomaty no halefa any aminy. Toeran’ny Sekretera voalohany amin’ny masoivoho malagasy any Italia ity nanendrena olona ity. Manamboninahitra miaramila no nanankinana io andraikitra io. Teo am-piandohana dia ny jeneraly Rakotonandrasana Noël, ministry ny fiaroavam-pirenena teo aloha no tokony ho nandray io toerana io. Niova izany taty aoriana, ary raha tsy misy ny fiovana dia ny lietnà kolonely Charles Andrianasoavina indray no notendrena. Izy anefa tafiditra anatin’ny lisitr’ireo olona miisa 109 nosazian’ny filankevi-pilaminan’ny Vondrona Afrikanina ny 19 martsa 2010.

Ny Vondrona Eoropeanina ihany koa teo andaniny nanidy varavarana amin’ny FAT ary tapaka ny dinika, sazy manan-kery mandritra ny 12 volana io. Mpikambana ao amin’ny Vondrona Eoropeanina ny Italianina ary mazava fa dia fampiharana io fanapahana io ihany no nataony, fa tsy toy ny an-dry zareo Frantsay, izay samy mpikambana ao ihany saingy minia mandika tsotra izao ny fepetra nataon’ny Vondrona Eoropeanina. Vao farany teo izao dia afaka nandeha tany Frantsa ny lehiben’ny Etamazaoron’ny tafika, ny jeneraly Ndriarijaona André nanatrika ny matson’ny miaramila zanatany tamin’ny fetim-pirenena frantsay ny 14 jolay teo, na dia naman’ireo 109 voazasy koa aza ny tenany.

Tia Tanindrazana

Samia mijoro ho an'i Gasikara.