Politique

Partagé sur :
• facebook

Hentitra ny tenin’ny depiote Raharisaina Hery, anisan’ny mpitarika eo anivon’ny ankolafy Ravalomanana raha nivahiny tao amin’ny radio Fahazavana izy ny sabotsy alina teo, ary notsoriny fa : «mazava ny resaka fa maniry ny hijanona maharitra eo amin’ny fitondrana ny HAT mba hahafahan’izy ireo mandroba ny harem-pirenena sy mameno ny paosiny arak’izay azo atao ».

Aminy dia tsy manana eritreritra afa-tsy ny hameno ny paosiny sy hanangon-karena ireo mpitondra ao amin’ny HAT amin’izao fotoana, ka mitady izay fomba rehetra haharetany eo amin’izany fitantanana ny firenena izany. Anisan’ireo tsy mitsitsy fitenenana moa ity depioten’i Vohémar ity rehefa manakiana ny fitondrana tarihan’i Andry Rajoelina. Ankoatr’io fanambarana nataony io dia nohamafisiny fa tsy menatra ny mivadika amin’ny nekeny sy nambarany ny filohan’ny HAT, ka nametra-panontaniana mihitsy izy hoe : mahafantatra tsara ny zavatra ataony ve i Andry Rajoelina sa manatanteraka baiko fotsiny ? Mahakasika ny toeran’i Lafrantsa amin’ny zava-mitranga eto Madagasikara kosa, dia notsipihan’ny dokotera Raharisaina Hery fa efa diso vanim-potoana ny Frantsay, satria efa taona 2010 isika izao fa tsy 1960 intsony. Efa niova tanteraka amin’izao fotoana ny politika maneran-tany sy ny fomba fifandraisan’ny firenena samy firenena, eny fa na dia ireo mpanjanatany fahiny sy ireo zanataniny aza. Tsy mandaitra intsony noho izany ny politikan’ny fampizarazarana sy ny fampiadiana an-trano, izay kasaina hapetraka eto Madagasikara, araka ny hevitr’ity olomboafidy Tiako I Madagasikara ity. Ho azy, dia ny fampiharana ny fifanarahan’i Maputo sy Addis Abeba ihany no vahaolana mahaomby ivoahana amin’ny krizy, ary vao mainka hampitombo ny fahorian’ny vahoaka sy ny fahasahiranan’ny Firenena ny fanapahan-kevitra samirerin’i Andry Rajoelina. 

Tia Tanindrazana

Samia mijoro ho an'i Gasikara.