Politique

CNOSC Nihaona tamin�ny ankolafy telo

Politique
Talata 27 Jolay 2010

Tonga nihaona sy nifampidinika tamin’ny ankolafy telo teny amin’ny villa “La Franchise” Ivandry, misy ny trano fonenan’ny Pr Zafy Albert, omaly ny CNOSC, komity ivondronan’ny fiarahamonim-pirenena izay teraka taorian’ny fifanaovan-tsonia fiaraha-miasa eo amin’ny KMF/CNOE sy ny “Alliance” ary ny “Coalition” des OSC (Organisation de la Société Civile) ny zoma 23 jolay teo. Fihaonana fampahafantarana ny antom-pisiany sy ny andraikitr’izy ireo amin’ny famahana ny krizy eto Madagasikara izy ity. Noresahina betsaka tamin’izany ny fihaonambem-pirenena. Raha nanazava i Fetison Rakoto Andrianirina, lehiben’ny delegasion’ny ankolafy Ravalomanana dia nilaza fa “azo atao ny mifampidinika rehefa misy ny fitoniana politika. Na izany aza dia mametra-panontaniana izy, raha toa manam-piniavana ary resy lahatra amin’izany ny ankolafy Rajoelina, izay sakana hatrany amin’ny famahana ny krizy teto”. Fanontaniana napetrany koa ny amin’ny fanatanterahana izay zavatra tapaka amin’izay fihaonana hatao eo? Fanontaniana tsy nahitam-baliny, fa dia ho lahadinika amin’ny fihaonana manaraka.