Politique

Partagé sur :
• facebook

Mampitombo ny fihaonana amin’ireo karazan’olona sivily sy miaramila tato ho ato ny praiminisitry ny HAT, Camille Vital.

Ny vaovao re farany dia nihaona tamin’ny tompon’andraikitra ara-miaramila frantsay miasa ao amin’ny masoivoho frantsay, ny sabotsy lasa teo ny praiminisitra. Amin’ny maha fihaonana tsy ofisialy azy, dia tsy nisy koa ny fampitam-baovao ofisialy, saingy azo antoka fa manodidina ny raharaham-pirenena sy ny famahana ny krizy mikotrika eo anivon’ny foloalindahy no anton’izao fihaonana izao. Nibaribary tato ho ato fa misavorovoro ny miaramila, indrindra taorian’ny nanilihana ny minisitry ny foloalindahy ny jeneraly Noel Rakotonandrasana. Araka ny tsiliantsofina re ihany dia manomboka tsy mahafaly ny manamboninahitra maro, eny fa na dia ireo tsy niteny mihitsy aza hatramin’izay, ny fihaonana eo amin’ny praiminisitra sy ity tompon’andraikitra ara-miaramila frantsay eto amintsika ity. Amin’izy ireo tokoa mantsy dia midika ho fidiran’i Frantsa amin’ny raharahan-tokantranon’ny malagasy, indrindra fa ny tafika malagasy izao fihaonana izao. Ekena, hoy ireto manamboninahitra ireto fa ilaina ny fakan-kevitra sy fifanakalozana traikefa, saingy tsy mety kosa ny hoe ny manamboninahitra avy amina firenena hafa, na iza io na iza, no hibaiko an-kolaka ny miaramila malagasy, na handroso vahaolana hamahana ny krizy eo anivon’ny tafika malagasy. Efa hatramin’ny niandohan’ity krizy ity rahateo no nahoraka fa i Frantsa no tao ambadiky ny fanonganana ny fitondrana Ravalomanana, ka ny mampanahy ny ao amin’ny foloalindahy dia ity fitsabahana, indray amin’ny raharahan-tokantranon’izy ireo ity. Ary ny tena mampatahotra aza, dia alaim-panahy ny maro hieritrertra fa mety ho marina ihany ve izany, ilay siosion-dresaka nilaza fa efa miandry fotsiny aty amin’ny fari-dranomasintsika sy amin’ny nosy manodidina antsika ny tafika frantsay, vonona ny hiditra eto raha ilaina izany, ary raha misy miantso vonjy na fanampiana aminy. 

Tia Tanindrazana

Samia mijoro ho an'i Gasikara.