Politique

Benjamina Ramanantsoa Tokony hanao safidy mazava ny SADC

Politique
Alatsinainy 12 Jolay 2010

Taorian’ny fandalovan’ireo iraky ny SADC teto Antananarivo sy ny fihaonan’izy ireo tamin’ny ankolafy politika maro samihafa, na ny avy eo amin’ny fitondrana io na ny avy amin’ny mpanohitra dia mitohy hatrany ireo fanehoan-kevitra ny amin’ny mety ho tohin’ny raharaham-pirenena sy ny famahana ny krizy. Ho an’i Benjamina Ramanantsoa, filohan’ny vaomieran’ny fifandraisana amin’ny any ivelany ao amin’ny FAT dia tokony hanambara mazava ny SADC hoe : manohana ny hetsika sy ny asa ataon’ny Raiamandreny Mijoro sy ny Vondron’ny fiarahamonim-pirenena ve izy ireo sa mitsipaka izany ? Raha manaiky ny SADC, araka ny filazany dia tokony hanampy sy hanohana izany asa izany, raha mandà kosa izy dia tokony hisintaka sy mijery fotsiny ety ivelany fa tsy miditra intsony amin’ny famahana ny krizy eto Madagasikara. Ho an’ity mpikambana ao amin’ny FAT ity, izay itovizany hevitra amin’ireo namany rehetra, dia efa misy ny rafitra napetraka hikarakara ny fikaonandoham-paritra sy ny fikaonandoham-pirenena, ary hikarakara ny fifidianana, ka tsy misy lalana hafa mbola tokony hokarohana indray fa efa ampy ireo. Izay manaraka dia manaraka, izay tsy mazoto kosa dia mijanona fa tsy manakorontana intsony.

Araka izany dia tsy niova mihitsy ny fomba fijerin’ny ao amin’ny FAT fa dia hanohy samirery ny lalana amin’ny famahana ny krizy, araka izay neritreretin’izy ireo, ary tsy miraharaha mihitsy izay mety ho hevitry ny hafa, indrindra moa fa raha tsy dia mitovy loatra amin’ny fomba fijerin’izy ireo izany. Hatreto anefa aloha, dia nandamoka daholo ireo fivoriana sy fihaonambe nokarakarain’ny fitondrana tetezamita, satria tsy nanaiky izany ireo ankolafy politika hafa, ary tsy naharesy lahatra ny sehatra iraisam-pirenena koa izany.

RTT