Politique

Augustin Andriamananoro Tsy re feo intsony

Politique
Alatsinainy 20 Febroary 2017

Ny 27 desambra 2016 teo no nivoaka ny fonjan'Antanimora rehefa notanana 17 andro tao ny filoha lefitry ny vondrona Mapar Augustin Andriamananoro. Tsy re feo intsony izy nanomboka teo.

Nisy tamin’ireo mpanara-baovao no efa naminavina ny fihetsiny taorian’ny namonjana azy. Raha nanao fanamby dia nisy nahazo volabe mihitsy satria dia toa mitady hitombina tokoa ny ahiahin’izy ireo. Raha ny tsikaritra dia nanomboka tamin’io 27 desambra io dia tsy hita niravaka volomboasary intsony ity mpanao politika ity, raha ny hita tamin’ny fifampiarahabana nahatratra ny taonan’ny vondrona Mapar tetsy Ambodivona farany teo aloha. Alahelo na hatezerana noho ilay filoha mpanorina ny vondrona Mapar tsy niteny tsy nivolana mba haneho hevitra ho fiarovana azy fony izy tany am-ponja ve sa nisy fifanarahana nifanaovan’ny fitondram-panjakana tamin’ity mpanao politika ity ho takalon’ny fanafahana azy tanteraka ? Tsiahivina fa mbola misy ny sazy mihantona miandry azy ka anisan’ny mampipetraka ny ahiahin’ireo mpanara-baovao amin’ny fihetsika hafahafa asehony amin’izao fotoana. Efa fomba fiadin'ny fanjakana ihany anefa ny managadra mpanao politika na mametraka sazy mihantona eo ambony lohany mba hanginany sy hipetrahany.

Mirija