Politique

Ankolafy Ravalomanana Miantso ireo Demokraty rehetra

Politique
Talata 02 Novambra 2010

Tonga ny fotoana hiraisan’ireo Demokraty rehetra hina, hoy i Fetison Rakoto Andrianiriana mba hametrahana ilay antsoina hoe : “front commun pour la victoire de la démocratie malgache”, adika malalaka hoe sehatra iombonana hiady amin’ny fampandresena ny demokrasia eto Madagasikara izay heverin’ny ankolafy Ravalomanana fa lalana iray hitondra amin’ny famahana ny krizy. Nomelohin’ity lehiben’ny delegasion’ny ankolafy Ravalomanana ity koa anefa, etsy andanin’izany, ny fihetsik’ireo mpanao politika sasany izay ao anatin’ireo andrim-panjakana amin’izao kisaritsarin-tetezamita izao.

Nambarany àry fa nanala tena teo anivon’ny antoko Tiako i Madagasikara ireo olom-boafidy ao anatin’ireo andrim-panjakana amin’izao fotoana izao ireo. Noho izany dia tsy manan-jo hiteny amin’ny anaran’ny TIM na koa ny ankolafy Ravalomanana izy ireo. Ny TIM izay ny filoha Ravalomanana no mpanorina azy ary i Yvan Randriasandratriniony kosa no filoha amperinasany. Hataon’ny FAT fitaovana ho amin’ny fampieiezan-keviny ny ambarantongam-pahefana rehetra, hoy ihany i Fetison Rakoto Andrianirina hany ka dia miteraka fikorontanana eo amin’ny fiainan’ny Malagasy izany. Tonga àry ny fotoana, hoy izy, ho amin’ny firaisankina, fa tsy ny ady, hanavotana ny firenena.

Nangonin’i Soa