Politique

Andry Rajoelina Tsy to teny intsony !

Politique
Alakamisy 05 Aogositra 2010

Fampihavanam-pirenena mifototra amin’ny famotsoran-keloka faobe, ny fandravana ny Fahefana Avon’ny Tetezamita, hirosoana amin’ny tetezamita tsy miandany handraisan’ny rehetra anjara no nisongadina tamin’ny «Dinika Santatra», izay ireo mpomba ny fitondrana ankehitriny no maro an’isa tamin’ny mpizaika. Tsikaritra, araka izany, fa manomboka mitsimbadika ny toe-draharaha satria toa tsy to teny intsony ny filohan’ny FAT, Andry Rajoelina satria kaikerin’ireo amboa kely tiany satria efa nametraka an-kolaka ny zavatra tsy nekeny kanefa dia ny nifanohitra tamin’izany no nitranga. Vokany, nampitandrina ny lehilahy, toa karazana fampitahorana sy fampihorohoroana toy ny mahazatra ary ahiana, hoy ireo mpanara-baovao fa tsy hanaiky ny hanaovana ny fihaonambem-pirenena ny tenany. Raha izao fandehany izao tokoa manko dia mety hiafara amin’ny fandravana ny FAT ny ho vokatry ny dinika rehetra hatao satria tsy hisy vahaolana afa-tsy ny fiaraha-mitantana. Mazava ho azy fa voaelingelina tokoa ny FAT tokoa raha izany no hiseho. Indrindra fa ireo mpiara-dia aminy fa tsy ny Ankolafy telo no mpandray anjara maro an’isa amin’ireo karazana dinika hoe hikaroham-bahaolana hifaranan’ny krizy.

Nangonin’i Soa