Politique

Andry Rajoelina �Tsy mpanao politika i Camille Vital � �

Politique
Zoma 30 Aprily 2010

« Tsy mpanao politika fa miaramila ny praiminisitra Camille Vital ». Izay no nambaran’i Andry Rajoelina raha nitafa tamin’ny mpanao gazetin’ny RFI izy, tany Pretoria. Tahaka ny eto an-toerana mantsy dia mahoraka any ivelany koa fa henjakenjana fomba fitantanana ihany ity praiminisitra notendren’ny filohan’ny HAT farany ity, ary tsy mitsitsy fitenenana na iza na iza miresaka aminy. Nilaza mazava izany i Andry Rajoelina fa tsy mpanao politika i Camille Vital fa miaramila, izany hoe raha adika tsotsotra dia tsy mivilivily fa rehefa manana tanjona iray dia izay ihany no fantany. Tsy anisan’ireo manam-paharetana ihany koa fa maika ny hiasa sy hanatratra tanjona izy, ary tsy mba mihatsaravelatsihy tahaka ny mpanao politika.

Toa fanomanana ny sain’ny olona amin’ny fananganana governemanta itambaran’ny miaramila sy ny sivily izany rehetra izany. Fa na izany aza anefa, nanaitra ny maro ihany izany, satria olana politika no nahatonga ny krizy teto, ka noho izany rariny loatra raha ny mpanao politika no mamaha io olana io. Mety hampitarazoka ny raharaha ny fametrahana miaramila amin’ny toerana ambony sy saro-pady tahaka ny hoe eny amin’ny primatiora izany. Marihana fa anisan’ireo manamboninahitra nosalorana ny gradina jeneraly farany teo moa ny praiminisitra Camille Vital, fisondrotana grady izay niteraka resabe teny anivon’ny lakazerina sy tany amin’ny sehatra maro.

RTT