Politique

Partagé sur :
• facebook

Vaky ambatolampy nandritra ny fandalovan’ny filohan’ny FAT tao Toamasina sy nandritra ny fampahafantarana ireo mpikambana ao amin’ny Filankevitra ambonin’ny tetezamita (CST) sy Kongresin’ny tetezamita (CT) tao amin’ny lapan’ny faritra Atsinanana ny ady «mangatsiaka» efa mila hivadika ady «mafana» eo amin’ny filohan’ny FAT Andry Rajoelina sy ny filohan’ny MTS, Roland Ratsiraka.

Roa andro tao Toamasina, Analanjirofo sy Atsinanana, ny filohan’ny FAT. Fa nandritra ireo hetsika rehetra ireo dia tsy hita sy tsy tazana ny MTS an’ingahy Roland Ratsiraka sy ny tenany amin’ny maha filoha lefitry ny CST misolo tena an’i Toamasina azy ihany koa. Tsy nipoitra ihany koa ny ekipan’ny MTS eo anivon’ny CST sy ny CT nandritra ny fampahalalana azy ireo tao amin’ny lapan’ny Faritra. Mpikambana CT 12 amin’ireo 18, ary 4 tamin’ireo CST miisa 6 ho an’ny Faritra Atsinanana no tonga. Raha ny tsiliantsofina re dia baiko midina no anton’io, nisy rahateo ny dian’ny MTS tany Fenoarivo Atsinanana sy Soanierana Ivongo, nanakonana azy kanefa 24 ora talohan’izao, anisan’ny nitarika olona nidina an-dalambe nanao «sit-in» teo anoloan’ny banky BFV-SG ingahy Maso José Michel, mpikambana CT.

Voatery nesorina ny seza natokana ho an’i Roland Ratsiraka tamin’ity lanonana ity, ka ny filoha lefitry ny CT, Rtoa Naharimamy Lucien Irma, no nitarika. Tsy hay koa anefa izay nanjo ity filoha lefitry ny CT misolo tena an’i Toamasina ity, fa nandritra ny famaranana ny lahateniny dia nampiasainy ilay hoe : “Masina ny Tanindrazana”, izay tsy fampiasa mihitsy raha sata repoblikanina marina no misy eto, afa tsy ireo manana fahefana amin’ny ara-tafika sy ny lehiben’ny tafika ihany.

Tia Tanindrazana

Samia mijoro ho an'i Gasikara.