Politique

Partagé sur :
• facebook

Antoko niorina tato anatin’izao tetezamita izao ny Ampela Manao Politika tarihan’ny filohany, Rasamoelina Brigitte izay sady filoha lefitry ny Kongresin’ny Tetezamita.

 Fampitomboana ny fandraisana anjaran’ny vehivavy amin’ny sehatry ny politika fa tsy atao mpitehaka fotsiny rehefa misy lanonana no tanjon’ny antoko saingy tsy manakana ny fidiran’ny lehilahy ho mpikambana izany, hoy ny filohany. Manandanja lehibe ho an’ny Ampela Manao Politika ny fanofanana ireo mpikambana momba ny tontolon’ny politika ho fanomanana azy ireo amin’ny andraikitra hosahaniny amin’ny fitantanan-draharaham-panjakana. Tari-dalana momba ny politika no natao ankoatra ny fanabeazana maha olom-banonana ary ny fahaiza-mitarika ka tanora miisa 28 no nanaraka izany. Andiany voalohany izy ireo saingy atsy ho atsy dia hivoaka koa ny andiany manaraka any Mahajanga sy Toliara raha ny fanazavan-dRasamoelina Brigitte. Marihina fa misy mpikambana roa ao amin’ity antoko ity koa nanaraka ny fiofanana nomen’ny Fredrich Ebert Stiftung momba ny politika. Adihevitra malalaka niarahan’ny mpitantana ny Ampela Manao Politika tamin’ireo mpiofan’ny Fredrich Ebert Stiftung no namarana ny fotoana omaly izay nanazavan-dRasamoelina Brigitte fa faharesen-dahatra no nananganany ny antoko fa tsy misy ifandraisany amin’ny zava-misy eran-tany ankehitriny voamariky ny fahamaroan’ny vehivavy mitana andraikitra ambony. Nambarany koa fa ny latsakemboky ny mpikambana sy ny fanohanan’ny vadiny izay mpandraharaha no fidiram-bolan’ny antoko. «Tsy manana mpanambola vahiny manohana izahay hatramin’izay fa hitady izany amin’izay izao», hoy izy.

Yves

Tia Tanindrazana

Samia mijoro ho an'i Gasikara.