Politique

Partagé sur :
• facebook

Manodidina ny 2500 olona no indray nanemitra ny filaharana nataon’ny Tiako I Madagasikara (TIM) tao Manakara raha nandray anjara tamin’ny matso fankalazana ny faha-51 taonan’ny fahaleovantena ny tao an-drenivohitr’i Vatovavy Fitovinany omaly.

 Nasehon-dry Andriano Giscard sy Rakotonandrasana Samuel ary ny ekipany fa tsy resy akory ny olo-mangina fa aleo miandry fifidianana ary lanim-bahoaka amin’ny ara-dalàna vao mandray fahefana. Mbola nohamafisin’ireo Anakavy amin-dreny sendra ny Tia Tanindrazana ihany koa moa fa tsy miala ary tsy hiala amin’Atoa Marc Ravalomanana ny TIM Manakara na eo aza ireo mihevitra ny hamily ity antoko ity amin’ny lalan-kafa. Fo falifaly, endrika miramirana no nasehon’izy ireo nandritra ny matso nanoloana ireo manampahefana sivily sy miaramila nanome voninahitra ity fetin’ny 26 jona tao Manakara ity. Nitohy tamin’ny fizarana nofon-kena mitam-pihavanana tao amin’ny tokotany malalaky ny Lycée Sileny Paul moa ny fetin’ireo Anakavy amin-dreny TIM ireo. Omby 11 no natolotra tamin’ity indray mitoraka ity izay fiaraha-mientan’ireo mpitarika ao amin’ny antoko no nananana azy. Araka ny fantatra dia nisy ny sakantsakana nataon’ny mpitantana ny tanàna tamin’ny fanatontosana ity fizarana nofon-kena mitam-pihavanana ity kanefa dia tontosa ihany rehefa nampiseho fahavononana ny avy ao amin’ny TIM fa tsy maintsy miroso ary ao anatin’ny filaminana no hanaovana izany.

Hyace R.

Sary : Ireo Anakavy amin-dreny miandry ny fandaminana teto amin’ny lycée Sileny Paul

Tia Tanindrazana

Samia mijoro ho an'i Gasikara.