Actualités

Partagé sur :
• facebook

Amin’izao fiandohan’ny taona izao dia marobe ireo mpankafy efa manontanintany mahakasika ny tarika Ambondrona. Fantaro ary fa hiantsehatra ao amin’ny Louvre Antaninarenina izy ireo anio manomboka amin’ny 9 ora alina, izay iarahan’ny tarika miasa amin’ny restaurant 313 sy ny Mi’Ritsoka Production.

 Raha ny fanamarihana nataon’ny tarika dia hiendrika “afterwork” ity seho an-tsehatra ity ary haharitra eo amin’ny ora telo eo. Ankoatra izay, nandritra ny fihaonan’izy ireo voalohany tamin’ny mpanao gazety omaly dia nampahafantatra ny ho fandaharam-potoanan’ny tarika, amin’ny ampahany sahady izy ireo. Hitodi-doha hianatsimo ny tarika ho fanombohana ny fitetezam-paritra ka handalo an’Antsirabe, Fianarantsoa ary hamarana izany any Ranomafana. Tsy ho latsa-danja anefa ireo faritra manodidina an’Antananarivo, izay mankafy ny tarika ihany koa. Any amin’ny fiandohan’ny volana mey kosa dia hiseho an-tsehatra goavana izy ireo, eto an-toerana hanolorany izay ho endriky ny fety hataon’izy ireo any amin’ny La Cigale, Paris, ny 09 Jona izao. Aorian’ny any ivelany dia hitohy ny fitetezam-paritra eto an-toerana. Nandritra ity valandresaka ity ihany koa no nampahafantaran’ny tarika ny fihemoran’ny fivoahan’ny rakikira fahenina. Raha ny paikady ara-tserasera nosafidian’izy ireo mantsy dia hoentina an-tsehatra sy alefa amin’ny haino amanjery aloha ireo hira vaovao vao entina hamidy hojifaina.

Tsy azo tsinontsinoavina ihany koa, hoy izy ireo ny andraikitry ny mbola fikorontanana ara-tsosialy sy ekonomika eto amintsika amin’izao fotoana, sy ny mbola firoborobon’ny “piratage”, izay iaraha-manaiky fa mamotika ny artista. Rahalina amin’ny 9 ora alina izany ny fotoana ho an’ireo izay te hiara-dalana amin’ny tarika amin’ity herinandron’ny mpifankatia ity!

‘Latinah

Tia Tanindrazana

Samia mijoro ho an'i Gasikara.